KNAPK: -Aningaasaliisariaqarput!

- Aalisariutinik nutarterinissamut ukiuni aggersuni aningaasaliisoqannginnera akuersaarneqarsinnaanngilaq!, taama allappoq Aalisartut Piniartullu Kattuffiata KNAPK-p siulittaasua Peter Olsen.

Taassuma tupigusuutigaa, inuussutissarsiutit pingaarnersaannut inuusuttut nutaanik aalisariutitaarnissaannik taama ammaffiginnittoqanngitsiginera.

- Eqqaamasariaqarportaaq aalisariutit pioreersut nutartertuartussaammata, Peter Olsen allappoq.

Tamannalu tunngavigalugu tikkuarlugu erseqqissaassutigaa Inatsisartunut ilaasortat qulakkeertariaqarmassuk aalisartut piniartullu aningaasanik taarsigassarsiniartarfeqartariaqarnerat.

Peter Olsenip ilanngullugu aamma akuersaarneqarsinnaanngitsutut uparuarpaa puisit amiisa akiinik apparsaasoqartuarnera.

- Tapiissutit 22,5 mio. koruuninik ikilinissaannik siunnersuut akuersaarneqarsinnaanngilaq, nunatsinni inuuniarneq taamak akisutigisoq piniartut atugaat ajorseriaqqissinnaanngillat, Peter Olsen allappoq.

Taassuma innersuussutigaa 2006-imi ammit 100.000-t tunineqartussat siunissami attatiinnarneqartariaqartut, taamalu 2007-mi ammit tunineqartartut 70.000-inut ikilisinniarneqarnerat akuersaarnartuutinnagu.