KNAPK: Aalisartut sulinerat akilerneqartariaqarpoq

Unammilleqatigiinnermut ataatsimiititaliap siulittaasua Carl-Aage Skovaa oqaraluarpoq akinik minnerpaaffiliineq sinnassaataaginnalersinnaasoq aammalu naammassisaqarsinnaassuseq isertitaqarnerlu qulakkeerneqanngitsoorsinnaasut.

- Saarulliit akii - nunatsinniunngitsoq nunarsuarmili niuffaffinni piumaneqarnerat apeqqutaatillugu - aalajangersarneqartartut, Skovaap marlunngormat oqaatigaa.

Taama oqarnera KNAPK-p erseqqissaateqarfigerusuppaa.

- Kalaallit Nunaanni akit nunarsuarmi niuffaffinni kaattaaffinni aalajangerneqarneq ajorput. Kalaallit Nunaanni aalisakkanut akit sinneruttut tassaasarput aalisartumut qanoq atsigisumik akiliinissamut apeqqutaalluinnartartut, tassa nunani tunisassiorfiit ingerlanneqarnerannut aningaasartuutit aamma assersuutigalugu Royal Greenlandip akissarsianut ingerlatsinermullu aningaasartuutai akilereeraangata, Leif Fontaine erseqqissaavoq.

Aamma erseqqissaatigaa, aki aalisartup pissarsiarisaa aamma tassaasoq ESU aqqutigalugu taarsigassarsisarneq atorunnaareermat, angallateqarnerminut akilersuinissamut atortagaa.

- Aalisartoq ullumikkut namminivik akilerlugu aalisariartarpoq, aningaaserivimmut taarsersuisarluni, aalisarnermi atortunik pisisarluni, aserfallatsaaliiilluni kiisalu suliffissaqartitsilluni. Peqatigitillugu nunamut tunisisussaatitaaneq peerneqanngilaq, taamaalillunilu aalisartoq nammineq ineriartortitsisinnaanissaminut soorlu tunitsivinnik pilersitsinissamut akissaqalernissamut periarfissaqarani, Leif Fontaine oqarpoq.

Namminersorlutik Oqartussat akinik minnerpaaffiliinissaat KNAPK-mit suli kaammattuutigineqarpoq.

- Sulineq akilerneqartariaqarpoq, uani pivara aalisartup suliaa. Kiammi assersuutigalugu entreprenøri akilernagu sulisissavaa? Namminersornermi akeqanngitsumik sulisoqarsinnaanngilaq, Leif Fontaine naggasiivoq.