KNAPK aaffattassiisoqarnissaanik ujartuisoq
![](/sites/default/files/styles/image_934x467/public/article_images/hvalros_-_foto_af_arne_moeller_qaqortoq_06_0.jpg?itok=Ng4lm-_l)
Ukiuunerani ukioq manna issaasannera pissutaalluni Nunatta avataata sikua issuallaanngitsoq KNAPK-p tikkuartorpaa:
- Piniartullu nalunngilluarpaat seqernup silallu kissatsikkiartornera ilutigalugu piffissami aggersumi ungasinngitsumi avataata sikupalaava sukkaqisumik avammut kimmut avalakkiartulissasoq. Taamaalillunilu aavernik piniarsinnaaneq ajornarsigaluttuinnartussaalluni. Maannamummi silap immallu anorlikkajunnersua piniarsinnaanermut killileereersoq atuutereermat, KNAPK ilaatigut taama allaaserisaqarpoq.
Piniartullu aaffanniarsinnaanissaat eqqarsaatigalugu taamaammat pisassiisoqartariaqartoq KNAPK isumaqarpoq, pinngortitallu allanngorarneranik kinguneqartut tunngavigalugit aarrinik piniartarnerup aqunneqarnera inatsisitigut tulluarsarneqartariaqarnera kissaatigalugu.
Aamma atuaruk Pisassiissutit Krusep paasisinnaannginnerarai
Naalakkersuisoqarfimmini pisussaaffigineqartut naammassineqarnissaat Aalisarnermut, Piniarnermut Nunalerinermullu Naalakkersuisup Karl-Kristian Krusep piaarnerpaamik piumasarissagaa, KNAPK-p aamma kajumissaarutigaa:
- Naalakkersuisoqarfiup atorfilittani aqqutigalugit akuersissutit tunniunnaveersaarnerisigut kulturitsinnik piniariaatsitsinnillu arsaartorsinnaanngilaatigut qaqugumulluunniit, KNAPK-p siulittaasua Henrik Sandgreen tusagassiuutinut nalunaarummi naggasiivoq.