Klaus Geisler Reumertimik nersornaaserneqareerami: Susoqarnersoq eqqaamarpianngilara
- Uumaa misigisat tupinnaqaat, aatsaavissuaq taama pissangatigivunga, inuppassuit akornaniikkama, tusaamasarsuit akornanni, toqqarneqarnissara naatsorsuutiginngikkaluarpara, taamaattumik tupattorujussuuvunga. Kalaaliullunga siullerpaamik nersornaaserneqarnera tulluusimaarutigaara, nersornaaserneqartoq, Klaus Geisler oqarpoq.
”Angutivik” oqaatsit marluiit atorlugit isiginnaagassiaavoq, atuakkiortumit Niviaq Korneliussenimit allataalluni kalaallillu angutip nutaaliaasup ukiuni untritilinni nutaani qanoq ittuunera oqaluttuarineqarpoq.
Klaus Geisler, isiginnaartitsisartutut, 2012-imit 2014-ip tungaanut ilinniartuusoq nersornaasigassatut innersuunneqarami toqqagaanissi ilimagisimanngikkaluarpaa
- Tassami ilitsersuisutta Hannep qangali oqarfiginikuugaminga qujassutimik allassasunga ajugaassagaluaruma, taava soorunami taamaaliorpunga, kisianni taaneqarama tupangaarama suna tamarmi puiorlugu oqaasissakka puiorpakka, Klaus Geisler oqarpoq.
Kalaalimillu siullerpaamik nersornaasiineq iluaqutaassasoq, Klaus Geisler oqarpoq.
- Danskit Nunatsinnut isiginninnerat ammariartorpoq, taavalu uannut inuttut isiginnaartitsisartutut aamma isumaqartorujussuuvoq, pissutigalugu kinaanersunga massakkut nalunnginneqaleriartorpoq, nersornaaserneqartoq, Klaus Geisler oqarpoq
