Kitaani nunamik eqqissisimatitamik pilersitsisoqarnialersoq

Nunatta kitaani nunamik eqqissisimatitamik pilersitsisoqarnialersaarpoq, Kangerlussuarmit avannamut Qeqertarsuup Tunuata nalaanut isorartussusilimmik nunamik eqqissisimatitamik pilersitsisoqalersaarluni.
Kitaani nunamik eqqiissimatitamik nutaamik suliaqarnissamut periarfissanik misissuisoqarnissaa Qeqqata Kommuniani Kommune Qeqertalimmilu kommunalbestyrelsit 2020 aalajangerpaat, Assi © : Bo Normander
Allattoq Mads Lynge, Signe Haahr Pedersen
juunip 02-at 2022 13:44

Qeqqata Kommuniata borgmesteria Malik Berthelsen, Kommune Qeqertalimmilu borgmesteri Ane Hansen tamanna pillugu innuttaasunik ataatsimiissitsisaqattaassapput, innuttaasut tamanna pillugu tusarniaavigineqassallutik.

Nunamik eqqissisimatitamik pilersitsisoqarneratigut aningaasarsiornerup pitsanngorsarneqarnissaa ilaatigut neriuutaasoq, Qeqqata Kommuniani borgmesterip Malik Berthelsenip oqaatigaa:

- Aningaasarsiornitsinnut iluaqutaanissaa anguniarneqarpoq, pinngortitallu naasuisa uumasuisalu illersorneqarnissaat nunamik eqqissisimatitsinerup soorunami siunertaraa, tassa siunissami sequtserisoqannginnissaa uumasunillu innarliisoqannginnissaa siunertaalluni, Qeqqata Kommuniani borgmesteri Malik Berthelsen taama oqarpoq.

AAMMA ATUARUK Kitaani kommunit nunatsinni nunamik nutaamik eqqissisimatitaqalerusuttut

Nunap eqqissisimatitap pilersaarutigineqartup annertussusissaa pillugu paasititsiniaalluni innuttaasunik ataatsimiissitsisoqartassaaq, taamatullu isikkoqartillugu innuttaasut qanoq isumaqarfigineraat tusarniaassutigineqassalluni.

Nunamik eqqissimatitamik pilersitsiniartoqarnera pillugu innuttaasunik ataatsimiissitsinerit.

 

  • Kangerlussuarmi: Sisamanngorneq juunip aappaanni, nal. 19.30 Illumi tamatigoortumi
  • Sisimiuni: Arfiningorneq juunip sisamaanni nal. 14.00 i Taseralimmi
  • Attu: Pingasunngorneq juunip arfineq-pingajuani nal. 16:00 Katersortarfimmi
  • Kangaatsiami: Pingasunngorneq juunip arfineq-pingajuani nal. 19.30 Katersortarfimmi
  • Niaqornaarsuk: Sisamanngorneq juunip qulingiluaani nal. 16:00 Katersortarfimmi
  • Aasiaat: Sisamanngorneq. juunip qulingiluaat nal. 19:30 i Sømandshjemimi

Suli piniartoqarsinnaassaaq

Kitaani nunamik eqqiissimatitamik nutaamik suliaqarnissamut periarfissanik misissuisoqarnissaa Qeqqata Kommuniani Kommune Qeqertalimmilu kommunalbestyrelsit 2020 aalajangerpaat, Avatangiisinut naalakkersuisoqarfimmit, Pinngortitaleriffimmit, WILD Nature Foundationimiillu peqataaffigineqartumit suleqatigiissitaq mississuinikuulluni.

Nunami eqqissimatitami piniartoqarsinnaannginnissaa innuttaasut ilaannit ilaatigut ernumassutigineqarsimavoq, Malik Berthelsenili tassunga atatillugu ima oqarpoq:

- Nunaqavissut eqqarsaatigalugit nationalparkinngortinneqassagaluarpat nunaqavissunut minnerpaamilluunniit sunniuteqartussaanngilaq, tassa ullumikkut pissutsit atorlugit nunamut piniariarfigisartakkamut tikissinnaaneq piujuaannartussaavoq, aamma pisuttuarusuttut soorlu assigisaanut tikissinnaanerannut periarfissaajuaannartussaapput, kisianni akerlianik assersuutigalugu nunarput takornariaqarnerulissappat taava takornariat sumut tamaanga pisussinnaaneri imaluunniit tarfisinnaaneri malittarisassiuunneqarnerisigut pinngortitaq uumasullu taava illersorneqassapput, Qeqqata Kommuniani borgmesteri Malik Berthelsen taama oqarpoq.

Nunamik eqqissimatitamik pilersitsiniarnermut atatillugu innuttaasunik ataatsimiissitsinerit ullumi aallartissapput, Kangerlussuarmi Illu tamatigoortumi unnugu nalunaaqutaq arfineq-pingasunut qiteqqunnerani siullerpaamik ataatsimiissitsisoqassalluni.

Aamma atuaruk