Kitaa misileraalluni aalisarfiulerpoq
Aalisarnermut, Piniarnermut Nunalerinermullu Naalakkersuisoqarfik tusagassiuutinut taama nalunaaruteqarpoq.
Aalisarnermut, Piniarnermut Nunalerinermullu Naalakkersuisoqarfik ingerlatseqatigiiffinnit arlaqartunit Tunumi avaleraasartoorniarnissamut akuersissummik tunineqarsimasunit immikkut qinnuteqaatinik arlalissuarnik tigusaqarsimavoq Kitaani avaleraasartoorniarnissaminnut kissaateqartunit.
Kitaani avaleraasartooqarnersoq paaserusunneqarpoq
Pinngortitaleriffimmit ilimagineqarpoq, sarfaq saarulliit aalisakkallu allat ingerlaartarfiat malillugu avaleraasartuut Tunumiit Kitaanut ingerlaartartut.
Taamaammat Tunumi avaleraasartuut amerliartortillugit Kitaani avaleraasartuut takussaanerulerumaartut ilimanarsinnaasoq Aalisanermut, Piniarnermut Nunalerinermullu Naalakkersuisoqarfik allappoq.
Peqassutsimut paasissutissat pisariaqartinneqartut
Pinngortitaleriffimmit Kitaani qanoq avaleraasartooqartiginerata paasisaqarfiginissaa soqutiginartinneqarpoq, paasissutissammi taakkua najoqqutaralugit peqassuseq naliliiffigineqarsinnaammat.
Taamaammat peqassutsimut paasissutissat Aalisarnermut, Piniarnermut Nunalerinermullu Naalakkersuisoqarfimmiit soqutiginartinneqarput, Nunatta siunissami naalagaaffittut sinerissamut qanittutut inissisimalernissatta qinnutiginissaanut avaleraasartuunillu ataatsimut pisassiissutaasartunik naammattunik pisassinneqartarnissaanut tunuliaqutaasinnaammata.
