Kissumiartaatit atornissaat mianersoqqussutigineqarpoq
Meeraaqqat arfineq-marluk ukiuni kingullerni aqqanilinni kissumiartaatiniitillutik USA-mi toqusimapput.
- Kissumiartaatit taakku amerlasuunut toqumik kinguneqartarnerat ilisimavarput, naalungiarsuillu mikinerpaat ulorianartorsiornerpaasut takusinnaavarput, Consumer Prodict Safety Commissionimi siulittaasoq, Inez Tanenbaum oqarpoq. Tamanna Berlingske.dk-mi atuarneqarsinnaavoq.
Atuisartut siunnersuisoqatigiivi mianersoqqussummik qanittukkut saqqummiussissasut naatsorsuutigineqarpoq.
Pisuni marlunni, arnaasut paasisarsimavaat pisiniarfileritillutik meerartik toqusimasoq. Ukiut aqqanillit ingerlaneranni toqusut arfineq-marluusut saniatigut 37-riarluni ajutoorujussuartoqarsimavoq, naalungiarsuit kissumiartaammit nakkarnerannit aallaaveqartumik.
Amerikami atuisartut siunnersuisoqatigiivi isumaqarput, naalungiarsuit inissakippallaartarnerat ajornartorsiutaasoq, tassami anersaartorsinnaajunnaartaramik. Mianersoqqussutissaq taamaallaat kissumiartaatinut nivinngataarluni siniffiusanut assingusunut atuutissaaq.
Kissumiartaatit atorneqartarnerannut illersuisut naalungiarsuit timimut attuutsillugit paarisarneranni iluaqutissartaasut suli ersersinniarsaraat.
