Kissarsuussuaq kulturi ikummarissarneqarpoq

Suliniutit assigiinngitsut aallartinneqassapput, ilaatigut tulleriiaarisussanik suleqatigiissitaliortoqassalluni aamma kulturi pillugu suliallit kattuffissaannik pilersitsisoqassalluni.

Kulturi pillugu siunnersuisoqatigiit siulittaasuat Inge Olsvig Brandt ima oqarpoq.

- Ulluni kingullerni marlunni pisut assilianngorlugit oqaatigissagukku kissarsuussuaq qisuttorneqarpoq ulikkaarlugu, aamartuinnarsuanngorluni qaangajattorsuanngorluni. Taamaammat kulturilerinermik suliaqartut pisariaqartilluinnagaannik isumasioqatigiippugut, imaannaanngitsorujussuarmik, Inge Olsvig Brandt oqarpoq.

Isumaqarpoq nunatsinni innuttaasut kulturi inuunertik tamaat malugisareeraat, kisianni ullup kulturisiorfiup atuutilerneratigut naalakkersuisoqarfik septembari qaammat aningaasaliimmat sinerissami kulturisiornerulernermik kinguneqartoq maluginiarpaa.

- Assortuussutigineqarsinnaavoq aningaasat inuussutissarsiutigalugu kulturilerisunut imaluunniit saniatigooralugu kulturilerisunut tunniunneqartassanersut. Uanga isumaga malillugu tamanut ammasumik aningaasaliisoqartassaaq, pisariaqartikkatsigit, siunnersuisoqatigiit siulittaasuat oqarpoq.

Taamaattumik aamma kulturip ulluinnarni sunniunnera ersarereernerarpaa aamma nukittorsarneqartuartoq unnerlugu.

Qagugorpiarli Kulturi pillugu politikkiliornissaq oqaatigisinnaanngilaa.

- Inuit ilaat oqartarput kulturpolitikkeqareersugut, ilaat taamaattoqannginneraasut. Kulturpolitikkeqarutta taava maanna ersarissimanngilaq. Ersarissartariaqassavarput immaqalu pujoralaajarlugu, oqarpoq.

Isumasioqatigiinnermi kulturimik sammisaqartut assigiinngitsorpassuit oqariartuutaat naalakkersuisunut allaganngorlugit tunniunneqassaput. Naatsorsuutigineqarporlu kulturi pillugu politikkeqalernissaq taassuma kingorna suliarineqarumaartoq.

Politikerit sulinerat maanna naammannginnerarpaa.

- Naamik naammanngilaq. Uagut kulturilerisuusugut immitsinnut aamma qiviartariaqarpugut oqarlutalu, oqariartuutivut naammappat? Akisussaaffeqartariaqarpugut, aamma akisussaaffik taanna ersarissumik tiguneqareersoq nalunngilarput, Inge Olsvig Brandt Katuap paarlersuani ualilluinnartoq naapikkatsinni oqarpoq.