Kissakkiartuinnassappat sanngiinnerusut toqoralissapput
Jyllandip kitaa aasaanerani kiattunisulli seqinnisaariartarfissuanngorlunilu nalukkiartarfissuanngorsinnaavoq, tamannalu silaannaap allanngoriartornerata iluaqutissatuarisinnaavaa, tassami silaannaq allanngorluinnarpat ajunaarnersuaqartussaavoq, EU-mi avatangiisit pillugit Pisortaqarfiup nalunaarusiaani nutaami tamanna atuarneqarsinnaavoq.
EU-mi avatangiisit pillugit Pisortaqarfiup nalunaarusiaani eqqoriarneqarpoq, silaannaap allanngoriartornera Europap kujataamiuinut ajunaarnersuarmik kinguneqartitsiumaartoq, allaat ukiut 63-it missaat qaangiuppata kiassuarmik toqquteqartut ukiumut 87.000-nngorsimassallutik.
EU-p avatangiisit pillugit Pisortaqarfiata nalunaarusiaa EU-p qullersaqarfianut sapaatip akunnerata tulliani tunniunneqassaaq.
Tuluit avisersuata The Financiel Timesip nalunarusiaq pissarsiarisimallugu allaaserinnippoq, qaammataasat atorlugit alapernaarsuinerit aallaavigalugit nalunaarusiortoqarsimasoq.
Nalunaarusiami oqaatigineqarportaaq sulinngiffeqarnerni ornigarneqaruartartut, Italia Spania Grækerillu nunaat gradinik arlalialunnik kiannerulissagunik takornariarfigineerukumaartut innuttaasullu sanngiinnerit kiassuarmik toqquteqartut amerliumaartut.
Nalunaarusiami oqaatigineqarpoq Europap kujataa ukiut tamaasa inunnit 100 millionilinnit takornariarfigineqartartoq, tassanngalu aningaasat 750 milliarder koruunit ukiumut kaaviaartitaasartut.
