Kisitseqqissaarneq saamerliit amerlanerussuteqarunnaarneranik kinguneqarsinnaasoq

Qinersiviit arlallit qinersinerup aqaguani kiseqqissaartoqarneranut atatillugu kukkunernik nalunaaruteqarsinnaapput. Tamanna Mette Frederiksenip saamerliunerni amerlanerussuteqarneranut kingunerlutsitsisinnaavoq.
Mette Frederiksenip saamerlerni amerlanerussuteqarnerminik suli qulakkeerivissinnaanngilaq. Assi © : Ritzau/Scanpix
Allattoq Ritzau, Tobias Malte Kristensen
novembarip 02-at 2022 13:56

Folketingimut ippassaq qinersineq Danmarkimi aatsaat taama pissangartigaaq, qinersivinnilu tamani kisitseqqissaartoqaleruttorpoq. Pappiaqqallu taasinermi allaffissat qinersivinni tamani kiseqqissaarneqaqqittussaallutik. Ippassaq unnukkut kisitsisinermi kukkusoqarsimanersoq paasiniarneqarpoq, sumiiffinnilu arlalinni kukkusoqarsimanera paasineqareerpoq.

Kisitseqqissaarneq sunaana: Kisitseqqissaarneq tassaavoq qinersivinni tamani pappiaqqat taasinermi allaffissat tamarmik misissoqqissaarneqarnerat, tamanna qinersinerup aqaguani pisarpoq. Tamanna taasinerit tamarmik eqqortumik nalunaarsorsimanissaannut qulakkeeriniarnerusarpoq.

Odensep kippasissuani Tarup Skolemi qinersivimmi kisitseqqissaarnerup takutippaa Liberal Alliancemik Kristendemokraternerinilllu taasinerit paarlattoorneqarsimasut. Aviisi Ekstra Bladet taama allaaserisaqarpoq.

Kristendemokraterne 205-init taaguunneqarsimasut aallaqqaammut oqaatigineqarpoq, Liberal Alliancelu 17-init taaguunneqarsimasut nalunaarutigineqarluni. Paarlattuanilli pisoqarsimasoq paasineqarpoq.

Sæbyp kulturikkut illorsuani Kulturhus Manegenimi kukkusoqarsimasoq ullumi aamma paasineqarpoq, Danmarksdemokraternemik Enhedslistenimillu taasinerit kisitsinermi siullermi tassani paarlaanneqarsimapput. Nutaarsiassaqartitsivik Ritzau taama allaaserisaqarpoq.

Qulakkeersimasoqanngitsoq

Kisitseqqissaartoqareerpat inernerit nutaat saqqummiunneqarumaarput, partiilli saamerliit amerlanerussuteqarnerisa allannguuteqarnerannik tamanna kinguneqassanersoq oqaatigineqarsinnaanngikkallarpoq.

Kisitseqqissaarnerit amerlanerussuteqartutut nalunaarutiginninnerit nalinginnaasumik allanngortinneq ajorpaat, piffissamili sivisuumi aatsaat taama naligiiffiutigimmat amerlanerussuteqarnerup allanngorsinnaanera sillimaffigisassaavoq.

Naalagaaffiit pissusiinik Aarhus Universitetimi Institut for Statskundskabimi professori Rune Stubager TV2-mut taama oqarpoq, nangipporli:

- Taamaattoqassappalli tupinnassaqaaq, taanna oqarpoq.

Kisitseqqissaarnerup Danmarkimi pingasunngornermi unnukkut naammassineqarnissaa ilimagineqarpoq, Mette Frederiksenilu partiit saamerliit allat peqatigalugit amerlanerussuteqarnersoq tassani paasinarsiumaarpoq.

Aamma atuaruk