Kisimiilluni umiartortoq siulleq Sullualukkoorpoq
Sullualuk - Amerika avannaqqullugu immakkut aqqutaa - tamaat uninngivilluni kisimiittumit umiartorluni aqqutigineqarpoq. Sullualukkoortoq tassaavoq angut New Zealandimeersoq.
Allattoq Najaaraq Egede
oktobarip 27-at 2010 10:42
Graeme Kendall Nuummiit apriilip 26-ianni aallarpoq, ullumilu ukiup affaa qaangiuteriillartorlu Aucklandimut apuulluni.
Angallataa immikkut ittumik sanaajusoq ateqarpoq 'Astral Express'. Angallat New Zealandimi Aucklandimut tikinnermini kalaallit erfalasuannik erfalasoqartuni siullersaavoq.
Graeme Kendall 2005-imili nunarsuarmik kaajallaaniaalulluni aallartippoq, ukiormannalu angalanera tassaavoq nunarsuup imartaasa imavissuisalu 32-iusut tamaviisa aqqutigisimanissaannik anguniagaata immikkoortuisa aappaat.
Angalanermi immikkoortua siulleq 2005-imi naammassivaa, taamani 18.000 sømilimik isorartussusilik qaammatini sisamani ingerlaarfigigamiuk.
