Kirkegaard: GME Limited pinerliinianut attuumassuteqanngilaq
Sara Olsvigip paaserusuppaa, Naalakkersuisut tusatsiakkanut ilisimasaqarnersut aamma paaserusullugu aatsitassarsiorfik, Narsap eqqaani Kuannersuarni aatsitassanik aappaaguminngaanniit piiaalernerani, Nunatta sillimaniarnermut politikkia innarlerneqarsinnaanersoq.
Tusatsiakkalli tamaattut paasiniarluaqqissaarneqarsimasut, Aatsitassaqarnermut Naalakkersuisup, Jens Erik Kirjkegaardip oqaatigaa.
- Kikkuunerminnik oqaatiginnikkusunngitsunik tamakku taamaassorinninnerinnaapput toqqammavissaqanngistunillu oqalunnerinnaallutik, Jens Erik Kirkegaard akivoq.
GME Limited aningaasanik niueqatigiittarfinni allattugaatigineqartoq aamma aktie-nik pisisinnaanermut tuniniaasinnaanermullu inatsisit malillugit periuseqartuusoq, Naalakkersuisup paasiniarsimallugu oqaatigaa.
GME Limitedimi piginneqataapput inuit 3.677-it taakkunannga inuit 3.451-it australiami najugaqartuullutik. Piginneqataasunuttaaq ilaapput aningaasaliinissamik piginneqatigiiffiit soraarnerusutisiaqarnissamullu aningaasaateqarfiit aningaaseriviillu.
- Suliffeqarfissuit aningaasanik niueqatigiittarfinni allattorsimasunut allanut naleqqiullugu GME Limited allaanerugaanngilaq, Jens Erik Kirkegaard nangilluni oqarpoq. Erseqqissaatigalugu oqarluni, GME Limited nunarsuatsinni nunani allani Nunatsinnilumi inatsisinik unioqqutitsisimasutut unnerluussutinik Naalakkersuisut tigusaqarsimanngitsut.
Jens Erik Kirkegaardip Sara Olsvigimut akissummini aamma eqqaamaqquaa, GME Limited Nunatsinni aatsitassanik piiaanissaanik akuersissummik tunineqanngimmat, tunineqartorli tassaasoq Greenland Minerals and Energy taanna Kuannersuarni misissuilluni aallartilluareersoq.
- Greenland Minerals and Energy aatsitassanik piiaanissaminik qinnuteqarpat soorunami inatsisit atuuttut aallaavigalugit tamanna nalilersorneqarumaarpoq. Akuerineqassappallu aatsitassanik uranitalinnik piiaanermi nunarsuatsinni tamanna pillugu maleruaqqussutit atuuttut malillugit isumaqatigiissusiortoqassaaq, Aatsitassanut Naalakkersuisoq, Jens Erik Kirkegaard naggasiivoq.