Per Kirkeby nutaamik saqqummersitsivoq
Sjællandip avannaani Charlottenlundimi Ordrupgaardip katersugaasiviani saqqummersitsinermi tamanna nittarsaanniarneqarpoq.
Eqqumiitsuliortup ujarassiuutut ilinniagallip eqqumiitsuliai Danmarkimi tusaamasaanerpaanut akisunerpaanullu akuupput, asulu ukiuni 50-it sinnerlugit nunatsinnut uteqqiajuarsimasuulluni.
Nunatsinnukaraangat ujarassiuutut atorfeqartarpoq, fiilmiliornerli aamma takornartarinagu. Taassumami fiilmi "Oqartussat oqarput tassagooq", Qullissat matusaanerat pillugu ukiut 40-t matuma siorna filmiliortoqarmat ilaasimalluni.
Piffissami tassanerpiaq Aasianni katersortarfiup iigai qalipaaffigimmagit, ulloq manna tikillugu assortuussutaaqaat.
Ordupgaardip Katersugaasiviani Per Kirkebyp qalipagaanik saqqummersitsineq ´Det Hemmelige Reservoir´- imik qulequtaqarpoq, kalaallisullu "Toqqorsivik isertortoq"-mik nutserneqarsinnaalluni. Kirkeby-p qalipagaasa qalipaatai nunatta pinngortitaata qalipaataanik sunnertissimaneqarneri malunnarput.
- Kalaallit Nunaata sunniutai Kirkebyp eqqumiitsuliaani uteqqianeri takussaapput, Erik Steffensen, Per Kirkeby-mut tunngasunik ilisimasaqarluartoq taama oqarpoq.
Saqqummersitsinermi Kirkebyp titartagai qalipagaalu takuneqarsinnaapput, saqqummersitsinerlu septembarip aappaata tungaanut takuniarneqarsinnaapput.