Kirgistanimi toqutaasut 117-inngorput
Toqutaasut suli amerlanerujussuunissaat Røde Korsit nunani tamalaani suleqatigiiffiata annilaanngatigaa.
Kirgisistanip kujataani pissutsit Røde Korsip isumakulunnartoqartippai. Ikiuiniarnermik suliniaqatigiit illoqarfimmi Oshimi tallimanngornermut unnuaanili eqqissiviilliornerit aallartiffianni sulisoqarput, taakkualu qullersaqarfimminnut nalunaarutaat isumakulunnarlutik.
Røde Korsimi sulisut Oshimi iliveqarfik ippassaq takuniarpaat inuillu 100-t sinnillit ilineqartut najuuffigalugit. Taamaalinerani toqutaasut pisortatigoortumik nalunaarutigineqartut 90-iupput, Røde Korsilu naliliilluni, Kirgisistanimi oqartussaasut tungaannit oqaatigineqartunit amerlanerungaartut toqutaasimassasut.
Uzbekistanimi ikinnerussuteqartut siulersortaat ulloqeqqata siornagut nalunaarpoq Uzbekistanimiut allanit kingoqqisut Kirgisistanimi allanit kingoqqisunut akiuunnermi 200-t toqutaasimasut.
Akersuunnerit naakkittaatsuliorfioqisut illoqarfinnut sisamanut siammarsimammata ikiuiniaqatigiit nunap ilaani tamaani sulinissaat ajornarluinnarpoq. Pissutsillu innuttaasunut ajorsigaluttuinnartut, Jørgen Thomsen ikiuiniaqatigiiffimmit Folkekirkens Nødhjælpimeersoq taqqavanngaanniillu tikeqqammersoq oqarpoq.
- Nerisassat imerlu assorsuaq amigaataapput, tamatumanilu sakkutuujunngitsut, sakkutuut nakkutilliisut, nakorsat nakorsaatitigullu ikiortit innaallagissamik atortoqaratik nal. akunnerini 48-ni sulisut aamma taakkuninnga amigaateqarlutik, pissutsillu nakkutigineqalinngippata ullualunnguit qaangiuppata tamanna inunnut suli amerlanernut kingunerlussalluni, Jørgen Thomsen naggasiivoq.
