GM Qajaq 2019 Kinngusaqattaarnermi Qaqortumit inernerit saqqummiunneqarput

Ujaminnattut tassaapput:

Ivinnguaq A. Olsen, Nuummeersoq,niviarsiaqqani qulinit aqqaneq-marlunut ukiulinni pissartanngorpoq, Carina Ezekiassenilu, aamma Nuummeersoq, niviarsiaqqani 13-init 14-inut ukiulinni pissartanngorluni.

Sinnii Tobiassen, nukappiaqqani 13-init 14-inut ukiulinni kuultinnappoq, Kuluk Jensenilu sølvinnalluni. Tamarmik Nuummeersuupput.

Ujarneq Tobiassen, nukappiaqqani 15-init 17-inut ukiulinni pissartanngorpoq, Dennis Jørgensen sølvinnattoq, Mikisuluk Poulsenilu bronzinnattoq. Tamarmik Nuummeersuupput.

Nuummiut pingasut 18-init 19-inut ukiullit aamma ujaminnapput, tassappullu: Kristian Evaldsen, kuultinnattoq, Karl Kleist, sølvinnattoq kiisalu Karl Bjørn Hansen, bronzinnattoq.

Inersimasut 20-nit 34-nut ukiullit aamma kingussaqattaarnermi unammipput.

Arnat:

Tanja Olsvig, Ilulissaneersoq, kuultinnappoq, Angerlaq A. Olsen, Nuummeersoq sølvinnattoq Malina Amondsenilu, Nuummeersoq, bronzinnattoq.

Angutit 20-nit 34-nut ukiullit:

Ari Josefsen, Nuummeersoq, kuultinnappoq, Kununnguaq Davidsen, Nuuk-Sisimiut, sølvinnttoqq Allan Josefsenilu Qaqortumeersoq, bronzinnattoq.

Julie Jessenip, qaannamik pissartanngorniunnermik aaqqissueqataasup, KNR-imut ilisimatitsissutigaa Qaqortumi ippassaq seqinnarissisarsimasoq, ataasinngornermullu naleqqiullugu silaginnerusimasoq.

Unammiuaarnerit annerusumik tamanna pillugu kinguaattoorfiusimanngitsut, taassuma oqaatigaa.

Qaannamik pissartanngorniunnerit ataasinngormat aallartipput, pilersaarutillu naapertorlugit arfininngornerup tungaanut ingerlassallutik.