Kinguussaassanngikkutta tamatta qarasaasiaqartariaqarpugut

Atuartut ilinniartitsisullu tamarmik qarasaasiamik angallattakkamik peqartariaqarput. Taamaliunnginnissatsinnut akissaqanngilagut aamma nunanut allanut sanilliulluta qarasaasiat atorneqartarnerinut kinguarsimanerulissaagut, taamatut oqariartuuteqarput paasissutissiinermut attaveqarnermullu teknologip siunissami periarfissai pillugit ataatsimeersuarnermi, Sarfarissumi peqataasut.

Sarfarissumi ataatsimeersuarnermi ataqatigiissaarissoq Aviâja Lyberth Lennert, ima oqarpoq:

- Siunissamut piareersassagutta suliniutit ilagisariaqarpaat, atuartut ilinniartitsisullu tamarmik qarasaasiamik peqalernissaat, Sarfarissumi ataatsimeersuartut taama oqariartuuteqarput.

- Ullumikkutut ingerlaannarsinnaanngilagut, qarasaasiat atorneqartarnerinut ilinniartitseriaaseq allanngortinneqartariaqarpoq, ullumikkut qaraasaasiat atorneqarnerinut periarfissat atorluarlugit, Aviâja Lyberth Lennert oqarpoq.

- Ilinniartitaanerup iluani siarsarniassagutta massakkut qanoq iliuuseqartariaqarpugut Aviâja Lyberth Lennert oqarpoq.

Atuartitaanerup iluani aningaasartuutigineqartut 1 procentiat atorlugu atuartut ilinniaritsisullu qarasaasianik pisaartinneqarsinnaapput ataatsimeersuarnermi tammanna saqqummiunneqarpoq, aningaasartuutit taakkua allangortilaarlugit tamanna anguneqarsinnaasoq oqaatigineqarluni.

Sarfarissumi ataatsimeersuartunit oqaatigineqarpoq, Kalaallit Nunaanni qarasaasiat atorneqarnerinut malinnaannginnissatsinnut akissaqanngitsugut, Kalaallit Nunaanni qarasaasiat atorneqartanerinut kinguarsimalereerpugut nunanut allanut sanilliulluta, Aviâja Lyberth Lennert oqarpoq.

- Massakkut aallartittariaqarpugut qarasaasiat ineriartortinneqarnerinut malinnaassagutta. Aviâja Lyberth Lennert suliffeqarfimmi Kompetence Kompagnimi atorfeqarpoq.

Ataatsimeersuarnermi inerniliussat Naalakkersuisunut suliassanngorlugit innersuussutigineqassapput.