Kinguppaat assagiarsuillu ikiliartornerat biologit isumakuluutigaat
-Kinguppaat assagiarsuillu ikiliartorput, maannangaarlu qanoq iliuuseqartoqanngippat nungusaataanngitsumik qalluinertut taaneqarsinnaajunnaassallutik, Helle Siegstad oqarpoq. 2009-mi 110.000 tonsit pisarineqarnissaat biologit siunnersuutigigaluarpaat. Ukiorli manna 132.000 tonsit pisarineqassangatinneqarmata Helle Siegstadip neriuutigaa biologit kaammattuutaat tusaaniarneqarumaartoq. Kinguppaat pisuussutitut pingaartutut biologinit taaneqarnerat aalisartut naalakkersuisullu isumaqatigissagaat qularutiginngilarput, taamaamallu akisussaassusilimmik pisarineqarsinnaasut killilerneqarnissaat pingaaruteqartoq neriuppugut isumaqatigiissutigisinnaassallutigu. Ukioq 2000-imiit kinguppaat amerliartorsimapput, 2003-milu amerlanerpaaffitsik angusimallugu, taamaammat ikilisaqqinissaat pinngitsoortinniartariaqarparput. Ukiuni arlaqalersuni kinguppaat ukiunik marlunnik pisoqaassusillit amerliartornerat nalunngilarput, allatut oqaatigalugu kinguppaat ikiliartorpallaartinnagit maannangaaq mianersortariaqalerpugut, mikisullu alliartornissaannik periarfissillugit. Biologit aamma assagiarsuit pillugit ukioq manna siunnersuisaleramik taakkua marsip qaammataaniit juulip tungaanut qallorneqartarnissaat siunnersuutigaat. Taamaaliornikkut assagiarsuit pinngorlaat qaleruaasa manngertissinnaanerat periarfissinneqassammat, naggataatigut aalisartut isertitaqarnerusinnaanerannik kinguneqartumik. Sisimiunili pissutsit tusarluarnartoqarput. Ukiuni kingullerni assagiarsunniarneq Sisimiuni killilersorneqarsimaqaaq, aalisarfiillu sumiiffimmi annikitsumi pisarmata assagiarsuit amerliartupallassinnaasimallutik. Ataatsimut isigalugu oqaatigineqarsinnaavoq assagiarsuit annerit amerliartorsimasut, minnerillu alliartornissaminnut periarfissaqarluarsimallutik, biologi, Ann Dorte Burmeister oqarpoq. Sisimiuni assagiarsuit pisarineqarsinnaasut 350 tonsit 800 tonsinut qaffanneqarnissaat biologit siunnersuutigaat. Qeqertarsuulli tunuani assagiarsuit ikiliartupiloornerat pissutigalugu, pisarineqarsinnaasut 1.500 tonsiniit 600 tonsinut appartinneqarnissaat biologit kaammattuutigaat.
