Kinguaassiuutitigut nappaatit pillugit misissuisoqarpoq

Kinguaassiuutitigut nappaatit pillugit misissuineq sukumiisoq Nuummi marlunngormat aallartinneqarpoq. 15-iniit 65-it tikillugit ukiullit kinguaassiuutitigut nappaatit pillugit qanoq ilisimasaqartiginersut Kalaallit Nunaanni illoqarfiit pingaarnersaanni misissorneqassaaq. Inuit katillugit 400-t, ilisimatuunut ikiortinit pingasunit, misissuinermut attuumassuteqartunit, septembarip naanissaata tungaanut oqarasuaatikkut apersorneqartassapput. Misissuinermi aaqqissuisup, Ruth Montgomery-Andersenip, neriuutigaa inuit peqataalluarumaartut. Inuit kinaassusertik isertuussinnaavaat.
aggustip 07-at 2008 06:41

- Assersuutitut taasinnaavarput kinguaassiuutitigut nappaat, klamydia, nunarsuaq tamakkerlugu Kalaallit Nunaanni atugaanerpaammat. Taamaammat misissuinermi inuit peqataalluarnissaat pingaaruteqartorujussuuvoq, kinguaassiuutitigut nappaateqarsimagunik nappaateqarsimanngikkunilluunniit, Ruth Montgomery-Andersen oqarpoq, nangipporlu:

-Kinguaassiuutitugut nappaatit pillugit inuit ilisimasaminnik oqaluttuussinnaappatigut, qaammarsaanitsinni suna anguniassallugu paasinerussavarput, Ruth Montgomery-Andersen nassuiaavoq. Suliarli ajornakusoornerarpaa, inuimmi oqalukkusuppianngillat.

-Inuusuttuunerusut peqataarusunngillat. Amerlanerit piffissaqannginnerartarput, allat kinguaassiuutitigut nappaatit pillugit apersorneqarusunngillat, apeqqutit inummut tunngavallaarnerarlugit, ilisimatuunut ikiorti Upaluk Poppel oqarpoq. Inuit 50-it manna tikillugu sianerfigineqarsimapput, 15-iinnaalli oqaloqatigineqarsimallutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq