Tunuliaqut Kinguaassiuutitigut innarliisimanermi kisitsisit annertuut, qularnartulli.
Nunatsinni inuusuttuaqqat kinguaassiuutitigut innarlerneqarsimasut suli amerlapput. Meeqqat atuarfiini atuaqatigiiaanni ikinnerpaamik ataaseq kinguaassiuutitigut innarlerneqarsimasartoq, Naalakkersuisut nalunaarusiortitaanni tamanna ersersinneqarpoq.
15-nit inorlugit ukiulinnik atoqateqarneq
Kinguaassiuutitigut innarlerneqarsimasut qanoq amerlatiginersut nalunaarusiami ersersikkuminaatsinneqarpoq. 15-it inorlugit ukiulimmik atoqateqarneq kinguaassiuutitigut innarliineruvoq. Tamanna niviarsiaqqat 53 %-iisa misigereerpaat, nukappiaqqallu 29%-iisa misigereerlugu.
Paasissutissat
Nalunaarusiaq ’Kalaallit Nunaanni Inuusuttut kinguaassiuutitinut tunngasut kinguaassiuutitigullu innarliisarnerit qitiutinneqarlutik’ SFI-mit atugarissaarneq pillugu naalagaaffimmi ilisimatuut misissuiffianni suliarineqarpoq. Naalakkersuisut suliassanngortissimasaat.
- Inuusuttut 18-niit 25-nut ukiullit misissuiffigineqarput.
- Apeqqutit inuusuttunut 400-nut nassiunneqarpoq, taakkunanilu 151-it akisimapput.
- Peqataasut nuna tamakkerlugu agguataarneqarsimapput. Inuusuttut nunaqarfinneersuupput illoqarfinneersuullutillu.
- Inuuttut 90-it qanimut apersorneqarsimapput.
15-init inorlugit ukiulimmik atoqateqarneq inerteqqutaavoq. Innarliinertut isigineqannginnera ajornartorsiutaavoq. Inuusuttuaqqat ukioqatigiit atoqatigiissimagunik innarliinertut taassallugu nalorninarpoq, innarliinerusinnaavorli.
Aalajangeeqataaneq imaluunniit naamik
Atoqateqarniaraanni nammineq aalajangerneqartarpoq. Nalunaarusiamilu ersersinneqarpoq inuusuttuaqqat ilaasa atoqateqarnissartik aalajangeeqataaffigineq ajoraat. Kisitsisillu ersersippaat niviarsiaqqat 33%-ii atoqateqarsimaagamik aalajangeeqataasarsimanngitsut. Nukappiaqqallu 5 %-ii aamma aalajangeeqataaneq ajorsimapput.
Inuusuttuaqqat atoqateqarnissaminnut aalajangeeqataasimasorisarnerat aamma ajornartorsiutaavoq. Kinguaasiuutitigut kanngunarsaasartoq uukapaatitsisimasinnaavoq, inuusuttuaqqat isumaqalersillugit nammineq aalajangeeqataallutik. Meeqqat inuusuttuaqqallu nammineq atoqateqarnissaminnut aalajangeeqataasimasorisartut tarnikkut katsorsaasartut naammattoortarpaat.
| Kinguaassiuutitigut innarligaasimasut | Arnat | Angutit | Arnat angutillu |
|---|---|---|---|
| 15-it inorlugit ukioqarlunga | 53 % | 32 % | 44 % |
| Siullermik nammineq aalajangiinngilanga | 33 % | 33 % | 33 % |
| 15-it inorlugit ukioqarpunga, namminerlu aalajangiinngilanga | 22 % | 5 % | 13 % |
Pissarsivik: SFI's undersøgelse af seksuelle overgreb 2014
Arfineq-marlunnik ukiulinnik kinguaassiuutitigut atornerluinerit
Meeqqat 7%-iisa arfineq-marlunnik ukioqarlutik imaluunniit suli arfineq-marluliinatilluunniit kinguaassiuutitigut innarleqarlutik misigereertarpaat, tamanna nalunaarusiami ersersinneqarpoq. Inuusuttuaqqat 13-inik 15-inillu ukiullit akornanni ukioqalereeraangamik atoqateqaqqaartartut nalunaarusiami aamma ersersinneqarpoq. Niviarsiaqqat nukappiaqqaniit nukarliukkajunnerusarput. Atoqateqaqqaaraangamik ukioqatiminnik imaluunniit utoqqaanerusumik atoqateqartarsimanersut kisitsisini ersersinneqanngilaq.
| Ukiut | Arnat | Angutit | Arnat angutillu | |
|---|---|---|---|---|
| 7-nik imaluunniit suli ukiukinnerit | 6 % | 7 % | 7 % | |
| 12-nik ukiullit | 3 % | 0 % | 2 % | |
| 13-inik ukiullit | 15 % | 9 % | 12 % | |
| 14-inik ukiullit | 28 % | 13 % | 21 % | |
| 15-inik ukiullit | 29 % | 17 % | 24 % | |
| 16-nik ukiullit | 9 % | 19 % | 14 % | |
| 17-nik ukiullit | 5 % | 3 % | 4 % | |
| 18-niit 24-nik ukiullit | 4 % | 21 % | 12 % | |
| Naluaat | 0 % | 12 % | 5 % |
Kilde: SFI's undersøgelse af seksuelle overgreb 2014