Erinarsortartoq nuannarineqarluartoq: Kinguaassiuutitigut atornerluinerit imminut toquttarnermut pissutaanerpaapput
![](/sites/default/files/styles/image_934x467/public/article_images/susan_aglukark_pressefoto.jpeg?itok=eiIF5WkY)
Naggueqatigiit Inuit indianerillu akornanni imminut toquttut, Canadap sinneranut naleqqiullugu 50-eriaammik amerlanerusut, sapaatip-akunnerata siuliani ataatsimeersuarnermi saqqummiunneqarpoq. Tamannalu soorunami tupaallaatigineqarpoq.
Canadami nunap inoqqaavisa akornanni imminut toquttut amerlanerannut pissutaasinnaasut pillugit oqaaseqarnissani erinarsortartup ilisimaneqarluartup Susan Aglukark-p kissaatigisimavaa.
Susan Aglukark-p oqaatigaa kinguaassiuutitigut atornerluisarnerit pissutaanerpaasut. Canadap issittortaani kitaamiuni Kangerlinermi najugaqarnermini taanna kinguaassiuutitigut nammineq atornerlugaasimavoq, nuussiamilu saqqummersitamini "Arctic Rose"-imi tamanna pillugu erinniorsimalluni.
Nunap inoqqaavisa meerartai ukiut marluk matuma sornatigut taamaammat sullitarilerpai, suliniullu "Arctic Rose Project"-imik taallugu.
Meeqqat Nunavummiittut toqqissisimanartumik inuuneqalernissaat suliniummi siunertaavoq. Inuttut pisinnaatitaaffiisa ataqqineqarnissaat, matumanilu meeqqat pisinnaatitaaffiisa ataqqineqarnissaat anguniagaavoq, assersuutigalugulu kinguaassiuutitigut atornerluinerit akiorniarneqarnissaat pingaarnertut suliniutigineqassalluni.