Canadami nunaqarfimmi imminut toqoriaraluartorpassuit ajornartorsiutaasut

Septembarip qaammataanili inuit 101-it imminut toqoriaraluarsimapput.

Attawapiskat apisartumi Ontariomiittoq 2000-inik innuttaqarpoq, Canadami nunap inoqqaavineersut indianerit tamaani najugaqarput.

Ullup ataatsip ingerlanerinnaani - tassa arfininngormat inuit aqqanillit imminnut toqoriaraluarput. Utoqqaanersaat 71-inik ukioqartoq nukarlersaat aqqanilinnik ukioqarpoq, taamaattumik aqutsisuat Bruce Shisheesh iliuuseqarnissamik piumasaqarpoq:

- Susoqarnersoq paasissallugu kissaatigigaluaqaara. Eqqarsaataat atuarsinnaassagaluarakkit, taanna canadamiut raadiuannut oqarpoq.

Qaammatip siulianiinnaq inuit 28-it imminnut toqoriaraluarput, nunaqarfimmilu aqutsisut sukannersumik aqutsiniarlutik maanna aalajangerput. Taamaalillutik innuttamik ikiorsernissaannut aningaasat amerlanerusut atorsinnaajumallugit.

- Inuit tamakku naalliuuteqarput, Bruce Shisheesh oqarpoq. Taassuma isumaa malillugu inuit taamaaliornerannut qinngasaarisarneq atornerluinerlu peqqutaapput.

Septembarilli qaammataani inuit 101-it imminnut toqoriaraluarsimapput. Ataaseq toqusimavoq. Canadami nunap inoqqaavisa akornanni Manitobamiittumi Pimicikamakimi alianartumik tamatumunnga assingusumik aamma pisoqaqqammivoq. Qaammatit marluk ingerlanerini arfinillit imminnut toqupput, sapaatit akunnerisalu marluk ingerlanerini 140-it toqoriaraluarlutik.

- Suliffissaqanngikkuit, ilinniagaqarnak nunanilu allamiutut atugarissaartiginak avataaniittutut misigisimassaatit, aqutsisoq Sheila North Wilson nassuiaavoq.

Canadami indianerinit kingoqqisut 1,4 millioniusut nunaqqamminnut allanut naleqqiullutik piitsuunerupput tamakkunanitullu inuunertutigissanatik. Tamakku peqatigiillutik maanna nuna tamakkerlugu iliuuseqarnissamut kajumissaaripput.