Kinguaassiuutitigut atornerluineq oqallisigineqarpoq

Paarisa, Nuummilu meeqqat inuusuttullu illuat, Mælkebøtten, meeqqat kinguaassiuutitigut atornerlunneqartarnerat pillugu ippassaq Katuami immikkut sammisaqartitsipput.

Inuit 200-nit amerlanerusut saqqummiunneqartunik tusarnaarput oqallinnernullu ilaallutik.

Mælkebøttenimi pisortaq, Kirsten Ørgaard, oqallisissiamini aperivoq kinguaassiuutitigut atornerluisarnerit qanoq pinngitsoorniarsinnaanerigut. Ørgaardi nammineq isumaqarpoq inunnik isumaginninnerup iluani ajornartorsiutit ataatsimut isigalugit aaqqiiffiginiarnerisa saniatigut angajoqqaat tamarmik kinguaassiuutitigut atornerlunneqartarneq pillugu meeqqaminnik oqaloqateqarnerisigut ajornartorsiut akiorniarneqarsinnaasoq.

- Kinguaassiuutitigut atornerlunneqarneq ajortuusoq meerarpassuit nalusarpaat, atornerluiniartummi aamma meeqqat tamarmik taamaattarnerarlugit oqaluttuunniartarpaat. Taamaammat meeqqavut paasitittariaqarpavut kinguaassiuutitigut atornerlunneqartarneq ajortuusoq, meeqqallu namminneq sunaluunniit nuannarinngikkunikku naaggaarsinnaatitaasut. Meeqqavut oqaluttuuttariaqarpavut, aap, inersimasut aalajangiinerusartut kisiannili, suut ajunngitsuunersut suullu ajortuunersut, inersimasullu nuanniitsumik annernartumillu meeqqanut pinnittarnerat ajortuusoq, qanoq eqitsineq ajunngitsuunersoq, qanorlu inersimasut eqitsinerat ajortuunersoq meeqqatta paasisariaqarpaat, Kirsten Ørgaard oqarpoq.

Qallunaatut isiginnaagassiaq ”Det bliver sagt” Katuami arfiningorpat takutinneqassaaq, danskip atuakkiortup Kristian Ditlev Jensenip kinguaassiuutitigut nammineq atornerlunneqartarsimanera aallaavigalugu isiginaagassiortoqarami.

Isiginnaagassiaq takutineqareerpat oqallinneqassaaq, Kristian Ditlev Jensenip peqataaffigisaanik.