Kinguaassiutitigut atornerlugaasimasup allat ikiortissarsioqquai

- Siullerpaamik saaffiginnilluni ajornakusoortorujussuuvoq, ila killissanik qaangiineruvoq, tassami ajornartorsiutit annertuallaartutut misiginartaramik. Ikioqquneq ilorraallannartumik misigineqartartoq, Suulut oqarpoq.

Suulut, misigisimasaanik oqaluttuartitarput, assigiinngitsunik tunngaveqarluni kinaassutsiminik isertuussivoq. Suulut arfineq pingasunik ukioqartoq angajoqqaavisa ikinngutaata kinguaassiutitigut atornerluppaa. Atornerlugaasimaninilu ulloq manna tikillugu ajornartorsiutigiuarpaa, soorlu ikiaroornartumik imigassamillu atornerluinermik aamma ajornartorsiuteqarluni. Suulup aporfigiuakkami ilaat ima nassuiarpaa:

- Uannut tulluanngitsunik aappaqalersarpunga, aappariinnerput tamatigut ajortumik ingerlasarpoq, qimattarlutalu. Tassalu uteqattaartumik taamatut ingerlasarpunga. Ukiut sisamat kingulliit ajornartorsiutigisakka ukiut 30-t matuma siornatigut ajornartorsiutigisama assigai, Suulut oqarpoq.

Suulup tarnip pissusaanik ilisimasalimmik oqaloqateqartarsimanini oqilisaatigaa, allallu namminermisulli inissisimasut ikiortissarsioqqullugit kaammattorpai.