Kinguaariinnik ujartuisarnerit nutarsarneqartut

Nunatta Allagaateqarfiata Ilimmarfiup auditoriaani saqqummiunneqarmata atuagarsuit qarasaasiamut nuunneqarneri saqqummiunneqarput. Atuagarsuit 50-it nuunneqarsimapput katillugillu 88-iullutik, ukioq 2012-ip ingerlanerani sinneri qarasaasiamut nussorneqassapput.

Atuagarsuarni suut nassaarineqarsinnaanersut arkivarip Inge Høst Seiding nassuiarpaa:

- Inuit amerlanerit atuagarsuarni ilaquttatik ujartarpaat, soorlu aanakkutik, aatakkutik, aanaqqiitik aataqqiitillu. Aamma allat siuaatik. Nalunaarsorneqarsimasarput inuit qanoq sivisutigisumik uumasimanersut, qassinik ukioqarlutik katissimanersut sunalu toqqutigisimaneraat.

Ilimarnarpoq Hans Egede siullersaalluni atuagarsuarnik nalunaarsueqqaarsimassasoq, kisianni taakku atuagarsuit peerunnikuupput. Atuagarsuit nutaannginnerpaartaat qatanngutigiinnianeerput, ukiorlu 1733-meerlutik, taavalu den danske missionip atuagarsui nutaannginnerpaartaat 1763-imeerput.

Atuagarsuit ilaat Ilulissani Uummannamilu annaaneqarsimapput, qanorlu pisoqarsimanersoq naluneqarpoq. Atuagarsuarnilli annaasaqarneq annerpaaq pivoq ukioq 1959-imi
Hans Hedtoft umiummat. Tassani annaaneqarput atuagarsuit Sisimiuniit, kujammut 1700-kkuunniit 1825-ip tugaanut nalunaarsukkat.

Inge Høst Seidingip siuaaminnik paasiniaarusuttut Sisimiuniit kujammut ikiorusuppai, qanorlu iliorsinnaasut nassuiaavoq:

- Sisimiuniit kujataanut arlaat siuaaminnik paasiniaarusuppat ikiuussinnaavugut, mailerluni uannut allattoqarsinnaavoq. Ataatsimik atuagarsuaateqarpugut Sisimiuneersumik, apeqqutaavorlu sumi kujataaneernerluni.

Tassa taama arkivareq Nunatta Allagaateqarfiani siunnersuivoq.

Kristine F. Petersenillu atuagarsuit qarasaasiakkut nuunneqarnerinik saqqummiunneqarneri najuuffigaa apersuillunilu.