Kingoraartissat Tasiilamut kiisami tikipput
Qulimiguuliup aaqqissuunnera ullumi ualikkut naammassineqassasoq naatsorsuutigaarput. Silalu ajussanngippat nunaqarfeeqqanut angalassinnaalissallutik Air Greenlandip pilersaarutigalugu KNR-imut oqaatigaa.
Inuit 100-ut missaaniittut ullut arfineq marluk kingulliit qulimiguuliup motooriata ajoquteqarnera peqqutigalugu Tasiilaamiit aallarneq ajuleqqapput.
- Ilaasussat paasitinneqarsimanngittut mittarfeqarfimmut nalunaassaaput. llaasussallu attaveqarnermut paasissutissaat malillugit nalunaarfigisimallugit mittarfeqarfiit nalunaarfigaatigut, Air Greenland taama allapput.
Qulimiguulik Bell-212 pingasunngormat marsip 16-ianili ajortissimavoq. Qulimiguuliullu motoria aserorsimammat, Air Greenlandip kingoraartissat Tasiilamut assartorniarsarai. Qulimiguuliup ajoquteqarnera paasineqarmat akunnerit arlaqanngitsut qaangiuttut kingoraartissat Kulusuup mittarfianut tikiunneqarput, silalli ajorneranik kingoraartissat Tasiilamut assartorniarnerat ajornarsimasoq, Air Greenlandip sulisoqarnermut pisortaata Mads B. Christensenip oqaatigaa.
Akunnittarfinnut aningaasartuutit qanoq annertutiginersut Air Greenlandip suli nalunaarutigisinnaangilaat, ullormulli 100.000 koruunit missaat aningaasartuutigalugit ilimagaat.
