Kinamiut umiarsuarmik alapernaarsuummik singitseqqammerput
Umiarsuaq alapernaarsuut taanna, alapernaarsuutinik allanik 36-nik malitseqassaaq, taakkulu umiarsualiorfimmi sananeqaleruttortut, aviisip Politikenip Beijingimi ilanngutassiortuata allaaseraa.
Alapernaarsuutit taakku nunani Kinap sanilerisaani ernumaammersitsipput. Qeqertat ataatsimoortut kikkunnit pigineqarnerannik aaqqiagiinngissutit qaqilerneqaqqilerput - matumanimi aalisarsinnaanissamut aamma uuliamik gassimillu qillerilluni qalluinissanut pisinnaatitaaffiit pineqarput.
Soorlu qeqertat ataatsimoortut Senkaku-mik taaguutillit Kinap Japanillu piffissami kingullermi aaqqiagiinngissutigaat.
Kinamiut alapernaarsuutaat nutaaq 77 meterinik takissuteqarpoq 43-nillu inuttaqarluni. Taamalu Kangilinnguani sakkuttooqarfiup alapernaarsuutaanit, Nunatta eqqaani alapernaarsuisartunit minnerulaarlutik.