Kinamiut nunatsinnut soqutiginnilluarput

Angalaqatigiit qulingiluaasut Kinameersut, Nunamut Pisuussutinullu Naalakkersuisoq, Xu Shaoshi siuttoralugu, nunatsinnut suleqateqarniarnertik nukittorsarniarsaraat.

Ove Karl Berthelsenillu oqaatigaa, ataatsimiinnertik iluatsilluartoq.

- Ilisimatusarnikkut annertuumik suleqatigiinnissamut, assigiinngitsutigut takunnissinnaalersimavugut. Tassalu imavissuit aammalu nunat qanoq katitigaanerannut tunngassuteqartunik misissuinerit, silaannaap kiatsikkiartorneranut misissuinerit aamma nunap sananeqaatanut misissuinerit, ilisimatussarneq aallavigalugu suleqatigiissinnaanernut periarfissat saqqummiunneqarput oqaloqatigiissutigineqarlutillu.

Taassuma saniatigut, nunatta aatsitassarsiornermut tunngatillugu sumut killinnersoq, kinamiut paaserusussimavaat.

- Taassuma saniatigut, soorunalimi Kinap tungaanut oqaaseqarpugut, aatsitassanik piiakkanik Kinamut tuniniaasinnaanerput soqutigigipput. Aammalu Kinap suliffeqarfiutaasa arlaata, aningaasaliinikkut suleqatigiinnissinnaanerput aamma oqaloqatigiissutigaarput. Aatsitassanut Naalakkersuisoq, Ove Karl Berthelsen taama oqarpoq.

Kinamiut angalaqatigiit, nunatsinnit ippassaq aallarput.