Kinamiut mingutsitsisuupput

Sermersuaq kingumut qaqorteqqinneqassappat aakkiartorunnaartinneqassappallu taava CO2-p mingutsinneqarnerata iliuuseqarfigineqarnissaanik oqalunneq unitsillugu, nunarsuarmi paaliortitsillutik mingutsitsisut saassunneqartariaqartut, aviisi Ingeniøren allaaserinnippoq.

Allatut iliuuseqarnikkut sermersuup aakkiartornera killilersimaarneqarsinnaasoq, ilisimatuut Københavnimi ataatsimeersuarneranni oqariartuutigisimagaat Ingeniørenimi allaaserineqarpoq.

- Qanorluunniit CO2-mik minguttaaliuiniartigigaluarutta, sermersuup aakkiartornerata unikaallannissaanut ukiut 50-t 100-lluunniit ingerlaqqaartussaapput. CO2-mik minguttaaliuineq soorunami ajunngitsuuvoq, tamatumali akiorniarnera allarluinnarmik periuseqarfigineqartariaqarpoq, taama oqarpoq silap pissusaa pillugu immikkut ilisimasalik Ole John Nielsen.

Taassuma ilisimatuullu allat erseqqissaatigaat nunarsuarmioqatigiit piumagunikku sermersuup aakkiartornerata sukkasuumik toraagalimmillu unikaallatsinneqarnissaa, taava Kina-mi, Indiami, Ruslandimilu suliffissuaqarfiit aamarsuarnik paarsuarmillu mingutitsinerat, aammalu nunarsuarmi eqqaavissuaqarfippassuit mingutitsinerat, taamatuttaaq biilerpassuit mingutitsinerat iliuuseqarfigineqartariaqalesoq.

Ilisimatuut taamatuttaaq erseqqissaapput mingutitsinerit tamakku teknologi atorlugu iliuuseqarfigineqarpata iluaqutissartaata angunissaa CO2-mik minguttaaliueruusaarnermut sanilliullugu sivikinneerarsuussagaluartoq.

- Paamik mingutitsinerup Kalaallit Nunaata sermersua nunarsuarmi sumiiffinnut allanut naleqqiullugu sakkortunerusumik mingutsittarpaa, sermeqassuseq pillugu immikkut ilisimatooq Carl Egede Bøggild Svalbard Universitetimeersoq oqarpoq.