Danskit aviisiat Kinap erfalasuanik quiassuaatiginnereersorlu utoqqatsissuteqaqquneqartoq
Danskit aviisiat, Jyllands-Posten, Kinap erfalasuanik quiassuaatiginnillu titartakkamik saqqummersitsinini pillugu Kinamut pisortatigoortumik utoqqatsertariaqarpoq. Kinap tamanna piumasaraa.
Kinap Danmarkimi aallartitaqarfia marlunngornermi taama allaaserisaqarpoq.
Jyllands-Postenip Kinap erfalasuanik quiassuaatiginnilluni titartakkamik saqqummiinera Kinamiut narrutsaatigaat.
Ullorissammi tallimat Kinap erfalasuaniittut coronavirusitut isikkilunnik taarserneqarsimapput:
- Narrutsaatigeqaarput, Jylands-Postenilu Kinami innuttaasunut pisortatigoortumik utoqqatsertariaqarpoq, tusagassiorfinnut nalunaarummi ilaatigut taama allassimavoq.
AAMMA ATUARUK Coronavirusimik Kinami toqquteqartut 100-nit amerlanerulertut
Kinali utoqqatserfigineqarnavianngitsoq, Jyllands-Postenip aaqqissuisuunerata, Jacob Nybroep, erseqqissaatigaa.
- Utoqqatsertariaqarsorinngilagut, isumaqarattami kukkusumik iliorata. Nikanarsaanissarput asissuinissarpulluunniit siunertarinngilarput, isumaqarpugullu titartagaq nikanarsaanerorpalaarnanilu asissuinerorpalaanngitsoq, Jacob Nybroe taama oqarpoq.
Kinalli niuernermut tunngasunut Danmarkimi allattoqarfiata, CCCD-p, titartagaq isornartorsiorpaa:
- Isummanik saqqummiussisinnaaneq ataqqivarput. Kinalli erfalasuata coronavirusitut isikkulinnik titartaavigineqarnera kinamiunut nunarsuarmioqatiminnit isumassorneqarnissamik tapersersorneqarnissamillu ullunani makkunani pisariaqartitsisunut asissuineruvoq, mitalliineruvoq ilaarutilliinerullunilu, CCCD-p qullersaa, John Liu, oqarpoq.