Kinamiut aningaaserivissuat 'paasisassarsiorluni angalasoq'
![](/sites/default/files/styles/image_934x467/public/article_images/china_development_bank_tower.jpg?itok=XPHHGloF)
Koreamiut sapaatit akunneri marluk matuma siorna tikeraarput, illoqarfiillu pingaarnersaat nunanit tamalaanit niuernermut tunngasumik tikeraartoqaqqilerpoq. Kinamiut suliffeqarfiisa aallartitaasa tikeraarnerat ullumi aallartissaaq.
Kinamiut pisortatigoortumik siornatigut tikeraartoqareernikuuvugut, tikeraartoqarnerali manna allaaneruvoq, Jenseeraq Paulsen, Greenland Investimi siunnersortaaneq nassuiaavoq:
- Privatimik tikeraarneruvoq. Kinamiut paasisassarsiuinnarlutik angalapput, Jenseeraq Paulsen nassuiaavoq.
Nunarsuarmi inuussutissarsiornikkut suliallit nunarput pillugu ilisimasaat suli killeqartupilussuupput, tikeraartoqarnikkullu tamatuma iluarsiniarnissaanut alloriarniminiinnaavoq.
- Naalagaaffeqatigiit ungasilliartortillugit, Kalaallit Nunaata suunnera soqarneralu nalunarsiartortarpoq, aningasaaliinermik siunnersorti oqarpoq.
Tallimanngorpat tungaanut, kinamiut Nuummit aallarnissaasa tungaanut, Kalaallit Nunaanni pissutsit pillugit "atuartinneqassapput". Aatsitassarsiornermut sanaartornermullu tunngatillugu inuussutissarsiornermut, assartuinermut angallassinermullu tunngasut sammineqassapput.
Suliaqarfiit taakku marluk immikkut sammineqassapput, Jenseeraq Paulsen oqarpoq.
- Tikeraartut aningaasaliisartuunerupput. Ilaatigut kinamiut ineriartortitsinermut aningaaseriviat peqataavoq. Aningaasaliisartut ilarpassui 'real estate'-mut, tassalu sanaartornermut, aningaasaliisartuupput ilaallu aamma aatsitassarsiorfinnut aningaasaliisartuullutik, Jenseeraq Paulsen, Greenland Investimi siunnersortaaneq oqaluttuarpoq.
Kinamiut ineriartortitsinermut aningaaseriviat, angalaqataasoq, danskit koruuniinik katillugit 3,9 trillioninik nunarsuaq tamakkerlugu taarsigassarsisitsisimavoq, aningaasaataalu Nunarsuarmi Aningaaserivissuup pigisaata marloriaatigai. Taamaammat 'paasisassarsiorluni angalaneq' asuliinnaanavianngilaq.