Kinamiut 1.000 Nunatsinnut 2013-imi tikeraarsarsimasut amerlisarniarneqarput

Kunngikkormiut Kinamut tikeraarneranni, sapaatip akunnerani massumani pisumi, Nunatsinnit peqataapput Visit Greenland, Inuussutissarsiornermut Qullersaqarfik, Air Greenland aamma Arctic Wonderland Tours. Taakku peqataanerminni Nunatsinnut takornariat amerlisarneqarnissaat siunertarineqarpoq.

- Kinamiut Nunatsinnut siorna takornariartut akunnittarfinnilu unnuisut 1.000-it missaanniipput, Tunumut Ilulissanullu takornariaanerusut, Visit Greenlandip pisortaa, Anders Stenbakken oqarpoq imalu nangilluni.

- Kinami angalatitsiviit Nunatsinnut takornariarnermik aaqqissuussisartut allallu taamatut takorluugaqartut, kunngikkormiut tikeraarnerat iluatsillugu periarfissiilluarpoq, Anders Stenbakken oqarpoq.

Kinami angalatitsivinnit 17-init tusagassiutinilllu assigiinngitsunit pingasunit Visit Greenland naapisimaarneqareerpoq, Beijing-iinnaanngitsumit aammali illoqarfissuarnit allanit pisunit naapinneqarlutik.

- Angalatsitsiviinit taama amerlatigisunit soqutigineqarnitta takutippaa, Kinamiut Nunatsinnut tikeraarusunneri. Taamaattumillu tamanna aningaasalersorneqarluartariaqarpoq aamma paasiniarneqartariaqarluni Kinamiut Nunarput sutigut soqutigineraat, Anders Stenbakken oqarpoq.

Visit Greenland, Ilulissani akunnittarfiit suleqatigalugit akunnittarfinni sulisunik sapaatip akunnerani massumani pikkorissartitsipput, Kinamiunut tikeraartussanut taakku piareersimanerunissaat siunertaralugu pikkorissartinneqarlutik, tassani aaqqissuisuulluni Li Wei Wang, taanna Ilulissat akunnittaarfiini ataqatigiissaarisuusoq.

Kinamiut amerligaluttuinnartut aningaasarissaarnerulernertik ilutigalugu, nunaminnit ungasissumut takornariartarnissartik. Taakkuuppullu nunarsuatsinnui takornarianut allanut naleqqiullutik aningaasanik atuinerpaasartut.

Kinamiut issittunut angalanissartik nuannarilluartuuaat, tamaani misigisinnaagamikkit arsarnerit, taamaattumillu Norge-p avannaa tikeraarfigineqarnerusimalluni.