Kinami silarlunnera annaassiniarnermut ajornakusoortitsivoq
Toqusut 12.000-iunissaat maanna ilimagineqarpoq, inuppassuillu qassiuneri suli ilisimaneqanngitsut illorsuit uppikaasimasut suli ataanniipput.
Kina-mi qaammatit pingasuinnaat qaangiuppata OL-eqarnissaa sioqqullugu nuna sajuppoq. Kinali pillugu ilisimasaqarluartup, ilisimatuup Kjeld Erik Brødsgårdip, OL-ip eqqugaanissaa ilimaginngilaa:
- Kinamiut soorunami ileqqoraat arlaannik pingaarutilimmik pisoqassatillugu sillimaqqisaartarput, tamaasa arlaannik isumaqartittarlugit, soorlu inuiaat allat aamma taamaattartut, taamaammat OL sioqqutitsiaannarlugu nunap sajorujussuarnera siulittuutitut nuannerpallaanngitsutut immaqa isigineqarsinnaavoq. Ilimagilluinnarparali aqussinnaajumaaraat. Pisortammi ippassaq ataatsimiipput, ikiuiniartussanillu sumiiffinnut eqqugaasunut nassiussuipput, aamma nalunngilara suna tamaat iluarsiumaaraat, Kjeld Erik Brødsgård oqarpoq.
-Burmami ajunaarnersuaqarmat tusartuarparput, ikiuiniarneq ajalusooqattaartoq, Kinamimita nunap sajunneranit eqqugaasut ikiorserniarnerat qanoq issava, aperaarput, akivorlu:
-Kina Burmamut naleqqiullugu upalungaarsimanerujussuuvoq, aatsaallu nunap sajunneranik misigisaqalinngillat. 1976-imimi juulip ulluisa 28-anni nuna sajorujussuarpoq inuit 6-700.000-it taamani ajunaarlutik, Kina nunarujussuuvoq pisuussuterpassualik, kisianni aamma iliuuseqarsinnaasoq. Kina Burmatuulli ileqqorlutsiginngilaq, Kinamilu aqutsisut innuttamik atugarissaartuunissaat burmamiuniit pimoorunnerujussuuvaat, taamaammat allatorujussuaq iliuuseqassapput, Kjeld Erik Brødsgård naggasiivoq.
