Kinami nuna sajoqqippoq
Kinami nunap immikkoortortaani Sichuan-imi arfininngornermi unnukkut nuna sakkortuumik sajoqqippoq. Taama pisoqarpoq inuppassuit tusindilikkaat angerlarsimaffimminniit, tatsini erngup qarsutsinissarsuanik ilimasaarneqareerlutik qatsinnerusunut, qimarratileruttortut.
Allattoq Najaaraq Egede
maajip 17-at 2008 17:11
Sapusiarsuit ilaat nunap ippassigami sajunneranit aseruasimasut sinerminik qarsutsissangatinneqarput.
Nunap ullumi sajoqqinnera nunap sajuttarneranut uuttuut malillugu 6,1-imik sakkortussuseqarsimasoq, USA-p nunap pissusaanik ilisimatusarfianit nalunaarutigineqarpoq.
Kinami oqartussat ullup ingerlanerani toqusunik nalunaarutaat 22.000-iniit 29.000-inngorput.
Kinami nuna ullut tallimat matuma siornagut sajorujussuarmat ajunaarsimasut taamaasillutik amerliartuinnavissut nalunaarutigineqarpoq, naatsorsuutigineqarportaaq inuit aqqunartitertut 200.000-inngorsimanissaat.
Nunat tamalaat ilisimatuuisa eqqoriarpaat, Kinami ajunaartut 50.000-iusimanissaat.
