Kinami inuit 40-t savilersortoqarnerani ikilerneqartut

Kinap kujasissortaani meeqqat atuarfianni ullaaq savilersortoqarmat atuartut inersimasullu 40-ngajaat ikilerneqarput.

Kinamiut  nutaarsiassaqartitsivii arlallit taama allapput. Ikilerneqarsimasulli tamarmik inuunermi navianartorsiunngitsut, Kinami nunap immikkoortuani Cangwumi napparsimmavik ilisimatitsivoq.

Nakkutilliisoq 50-inik ukiulik Kinami nutaarsiassaqartitsivik Global Times naapertorlugu savilersorsimasoq, tuluit nutaarsiassaqartitsiviat The Daily Star allappoq.

Savilersortoq tigusarineqartoq, Global Times allappoq. Meeqqat savilersorfigineqartut arfinillit 13-illu akornanni ukioqarput.

Savilersorfineqartut tamarmik inuunermi navianartorsiunngitsut

Atuartut atuarfimmiit aniatinneqarneranni videomik immiussaq, Global Timesip inuit nittartakkakkut attaveqaqatigiittarfianni Twitterimi ikkussaa, takuneqarsinnaavoq.

- Atuartut 37-t ajoquserujussuarsimanngillat, inersimasullu marluk ajoqusingaatsiarsimallutik. Taakku tamarmik napparsimmaviliaanneqarput, tamarmilli inuunermi navianartorsiunngitsut, Kinami oqartussat nutaarsiassaqartitsivik AFP naapertorlugu taama ilisimatitsipput.

Kinami savilersortarneq ukiuni kingullerni ajornartorsiutaagaluttuinnarpoq.

Pisumut assingusumik siorna septembarimi pisoqarpoq, Chaoyangpomimi meeqqat arfineq-pingasut atualeqqaarfimminni savilersortoqarnerani toqutaammata.

Angut 40-nik ukiulik atuartunut ullaakkut atuariartoqqammertunut taamani savilersorpoq.

Kinamilu illoqarfiit pingaarnersaanni Beijingimi atuarfimmi siorna januaarimi savilersortoqarmat meeqqat 20-t ikilerneqarput.