Kinami inatsisartut ataatsimiinnissaat kinguartinneqartoq
Kinami inatsisartut ukiumoortumik ataatsimiinnissaat kinguartinneqarpoq. Ataatsimiinnissaat nualluutip coronavirusip tuniluunnera pissutigalugu ukiut qulikkaat kingulliit ingerlaneranni siullerpaamik kinguartinneqarpoq.
Kinami naalagaaffiup tv-qarfia ullumi ataasinngornermi taama nalunaaruteqarpoq.
Kinami inatsisartut ukiumoortumik ataatsimiinnissaat marsip ulluisa tallimaanni aallartittussaagaluarpoq, ataatsimiinnerli ullunik qulinik sivisussuseqakkajuttoq qaqugu aallartissanersoq nalunaarutigineqanngilaq.
Kinami inatsisartut NPC-t Kinami pissaaneqarnerpaapput, naallu inatsisartutut taaguuteqaraluartut toqqaannartumik qinerneqarnikuunngillat.
Ilaasortat katillugit 2970-iusut akornanni amerlanerpaat Kinami kommunistit partiianni ilaasortaapput, nunallu immikkoortuisa inatsisartuinit toqqagaallutik.
Ilaasortat coronavirusip tuniluunnerunnginnissaa sulissutigigaat
Ukiut tallimakkaarlugit ilaasortaasarput.
Kinami nualluummik coronavirusimik akiuiniarneq inatsisartuni ilaasortat amerlasuut pingaarnertut ulluni makkunani suliaraat.
Inatsisartut ataatsimiilertussat tunillatsinnginnissamik assiaqutsersorsimanissaat pisariaqartinneqarpoq.
