Kinami illoqarfiup Ilulissat illoqarfittut ikinngutitaarerusukkaa

- Una soqutiginartorigamiuk illoqarfik taanna saaffiginnittoq, Weihai, uatsitulli aalisarnermik inuussutissarsiuteqarput, taavalu taakkua Kinap aalisarnermut pilersorneqarneranut pingaarnertut inissisimallutik.

Taamaattumillu illoqarfittut ikinngutiginnikkusullutik saaffiginnissuteqarnerat Avannaata Kommunianit soqutiginartinneqarpoq.

- Taamaattumillu aamma Nunanut Allanut Allaffeqarfik misissuitinnikuuarput politikkikkut arlaatigut aporfeqarnersoq. Qujanartumillu sapaatip akunnera kingulleq politikkikkut ataqatigiissaarisut ataatsimiinneranni nalunaarfigineqarpugut taamatut suliaqarnerput ingerlateqqiinnarsinnaagipput.

Illoqarfillu Ilulissat illoqarfianik ikinngutiginnikusuttoq aalisarnerinnarmik aallussiviunani aamma atisaliortarfeqarmat Avannaata Kommunianit soqutiginartinneqarpoq.

Ineriartortitsinermut iluaqutaasinnaanera neriuutigineqartoq

- Kommunitsinni ilusilersuisartut atisaliornermik soqutigisaqarunik, taava tassani suliaritillugit aamma niuernikkut taamatut attaveqarneq annertusarneqarsinnaasoq.

Niueqatigiissinnaanermi ilaatigut iluatigineqarpoq.

- Aamma Nunanut Allanut Allaffeqarfimminngaanniit kaammattorpaatigut Kinamut attaveqarneq pitsaasumik - niuernikkut iluatinnartuummat - taanna suliaq ingerlatiinnassagipput.

Aammali Kinamiunik ikinnguteqalerneq ineriartortitsinermut iluaqutaasinnaassasoq neriuutigineqarpoq.

- Aamma soqutiginikuungatsigu suliassanut aalajangersimasunut, soorlu multihaali imaluunniit naluttarfikkunnut Kinap suliffeqarfiutai aningaasaliisoralugit suliaqartitsisinnaanermut aamma atorusullutigit. Tassuunakkut aamma oqaloqatigiinnerit suli ingerlappagut.

Weihaip Kinamiittup 1,5 millioninillu ilnullip Ilulissat illoqarfianik, 4500-nik inulimmik, ikinngutiginnikkumalluni qinnuteqaata kommunalbestyrelsimut 2019-ip naannginnerani aalajangigassanngortissinnaassallugu, Avannaata Kommuniata naatsorsuutigaa.