Kinami angalatitsiviit nunarput soqutigilluaraat
Takornariartitsisarfiit Kinameersut 50-init amerlanerusut Beijingimiittut, takornariartitsisarfiillu 80-it illoqafissuarmit Guangzhouimeersut, nunatsinni takornarialerisartut saqqummiussaannik tusarnaariarnissaminnut periarfissinneqarput, nunatsinneersullu naapinnissaannut aamma periarfissinneqarlutik.
AAMMA ATUARUK Siunissami takorniarialerisarnissaq sukumiisumik piareersarneqarli
Visit Greenlandimi siunnersortaaneq Mads Lumholt tusagassiuutinut nalunaarummi taama ilaatigut oqarpoq:
- Kalaallit Nunaat soqutigineqartupilussuuvoq, takornariarfissaq nutaaq allatoortorlu, Kalaallit Nunaatalu Kinamiunit soqutigineqaleraluttuinnarnera aamma malunnarpoq. Pinngortitami kulturikkullu misigisassat Kinamiut soqutigisorujussuuaat, nunatsinni pinngortitaq innarlerneqanngitsoq, kulturilu immikkuullarissoq, Mads Lumholt oqarpoq.
AAMMA ATUARUK Naalakkersuisoq vil sælge vand i Kina
Kinamit takornariat 1400-t missaanniittut siorna 2017-imi nunatsinniipput, 2015-imut naleqqiullugu 28 procentinik amerleriarlutik. Nunatsinnut takornariartartut amerlanerpaat Danmarkimeersuupput, nunallu tulliuttut tassaapput Tyskland, USA, Frankrig kiisalu Kina.
Nunatsinnilu mittarfiliortiternissat pillugit pilersaarutit piviusunngussappata, nunatsinnut takornariartitsisarnerup annertunerulernissaa periarfissinneqassaaq, Mads Lumholt, Visit Greenlandimeersoq oqarpoq.