Kina tusaamasatut filmiliaritittartunngorusuppa
Kalaallit niviarsissat, 20-t missaannik ukiullit arllaat immaqa pileritsassaaq. Arlarsi tusaamasatut filmiliaritittartunngorusulluni pilerisuttarnerluni? Taamaappat Nunavumi Iqalunnut ulluni makkunani immaqa aallaruit iluatsitsisinnaassasutit.
Filmimi inuttaasartoq tusaamasarujussuaq, Ralph Fiennes, filmiliassamut pingaarnertut inuttaasussamik piukkunnartorsiorluni maanna Iqalunniippoq, inuttaasussaq tassaassalluni inuk inuusuttoq, filmimut suliarineqartussamut Ralph Fiennes ilitsersuisuussamaarpoq. Filmi taaguuteqassaaq ”Snow Country” Nuna aputilimmik immaqa nutsersinnaasarput. Taanna asanninnilersaarutaavoq, pingaarnertullu inuttaasussaq, arnaq inuk, ukiorpassuarni Canadap kujasissuani najugaqareerluni Nunavumut utersimassaaq, inuttut oqaatsini kulturinilu puioreersimallugit.
Ralph Fiennesip, Oscarimik akissarsisussatut marloriarluni innersuussutineqarsimasup – pingaartippaa, filmimi pingaarnertut inuttaasussaq tassaassasoq inuk, nalunngikkaluarpaalugooq isiginnaartitsisartutut naammassisimasumik nassaarnissaq ajornakusuussasoq.
- Inuttaasussap piviusorpalaartuunissaa inuttullu kissalaartuunissaa pingaarnerpaavoq, Ralph Fiennes nittartakkamut canada naggat comimut oqarpoq.
Maannalu tassa Nunavumiippoq, filmimi inuttaasussaq Alma-mik ateqartussaq ujarlugu. Peqataasussaasinnaasunik misilitsilluni filmiliaritinnissarsuaq, Nunavut Trade Show, maajip ulluisa pingajuanni pissaaq, niviaaluppassuillu neriulluaqisut tassani filmiliarineqassapput.
Charlotte DeWolff, Nunavumi Ajjiit Nunavut Media Associationimeersoq, naapertorlugu, niviaaluppassuit tusaamasanngussasoralutik pissanganerup pianik sinngorteruloorlutik Iqalunni angalaartut maanna takussaapput.
