Gassinik silaannarmik kissatsikkiartortitsisunik aniatitsinermik annikillisaanissaq, Kina-p peqataaffigerusunngilaa. Nunarsuarmi pisuujunersaat arfineq-pingasut Tysklandimi G-8-mik taallugu ataatsimiinnissaat sioqqullugu, silaannaq pillugu nalunaarut Kina-meersoq taama oqariartuuteqarpoq. Kina-li neriorsuivoq, innaallagissamik atuineq Kina-mi annikillisarneqassasoq, taamaasillunilu CO2-mik aniatitsineq annikillisarneqassalluni
Silaannaap allanngoriartornera pillugu nunarsuaq tamakkerlugu pilersaarut ukiuni marlunni suliarineqarsimasoq Kina-mut piumasaqarfiungaatsiarpoq. Ukiuni kingullerni arlaqartuni USA, silaannami gassinik kissatsikkiartortitsisunik aniatitsinerpaavoq, maannali Kina-p USA angujartulerpaa. Kina-lli nunatut taamatut saassunneqalernini naammagiunnaalerpaa:
Nunat siuarsimasut assigalugit nunani kinguarsimasuniittugut, taamatut piumasaqarfigineqarnerput naammaginanngilaq, Kina-mi pilersaarusiornermut ministeri Ma Kai oqarpoq. nangillunilu: - Nunatsinni nioqqutissiat suliarisartakkagut, suliareqqitassatut nunanit siuarsimasuniit aggersuusarput.
Danmarkimi avatangiisit pillugit ilisimatooq Søren Lytken oqarpoq Kina-p taamatut isummernera paasisinnaalluarlugu.
Kina nunatut aatsaat siuariartulersutut inissisimalerpoq, maannakkullu nunat siuarsimasutut assigalugit piumasaqarfigineqalerluni, taamaammat naammagittaalliornerat paasisinnaalluarpara, Søren Lytken oqarpoq.
Innaallagissamik sipaarnialernissamik Kina-mi pisortat pilersaaruteqarput, taamaasillunilu CO2-mik silaannarput aniatitsineq ikilisarneqassaaq.