Kina: Pinerluttuliortarnissamut kajumissaarut
Tusagassiorfiit naalagaaffimmit aqunnertut oqarput, nersornaammik tunniussineq Kinamut "isummamut tunngavigisatut sorsunnerusoq", tunniussinerlu "pinerluttuliortarnissamut kajumissaarutaasoq".
- Liu Xiaobo pinerluttuliornermut pisuutitaalluni parnaarussaavoq. Nobelip eqqissinermut nersornaasiuttagaa tassunga tunniunneqarmat assigiinnarpaa oqarutta pinerluttuliornermut kajumissaarisoqartoq, Kinami nunanut allanut ministereqarfimmi avammut oqaaseqartartoq, Ma Zhaoxu, oqarpoq.
Norgemiit Kinamiillu aallartitat ataatsimeeqatigiinnissaralui arlallit Kinap taamaatiinnarmagit, taavalu Liu Xiaobo-p iperagaanissaa, suliallu tassunga tunngasut unitsiinnarneqarnissaat, Japanimi ministeriunerup, Naoto Kan-ip, kaammattuutigereeraalu, taama oqalunneq aallartippoq.
Kinami Kommunistparti, Kinamilu demokratiip amigaatigineqarnera, killiligaananilu oqaaseqarsinnaatitaanerup amigaatigineqarnera, pillugit isornartorsiuisarnini pissutigalugit Liu Xiaobo ukiuni aqqanilinni siorna decembarimi parnaarussaavoq.
Kisiannili tassa politikkikkut aaqqissuusseqqinnerit, inuttullu Kinami pisinnaatitaaffiit pillugit, sorsuuteqartuarnini pissutigalugit Liu Xiaobo eqqissinermut nersornaasigaavoq.
