Kina nunat avannarliit issittorlu pillugit ilisimatusarfeqarfiliulerpoq
Kina nunani avannarlerni ilisimatusarfeqarfiit arlallit suleqatigalugit nunat avannarliit issittorlu pillugit ilimatusarfeqarfimmik Shanghaimi pilersitsinialersaarpoq. Kinap Issittumi Siunnersuisooqatigiinni maajip qaammataani alaatsinaattutut inissisimalernerata kingorna tamanna pivoq.
Norgemiut nittartakkatigut nutaarsiassaqartitsiviat, BarentsObserver.com, taama allappoq.
Allattoq Karsten Sommer, Simon Uldum
juunip 24-at 2013 05:08
Kinamiut Issittoq pillugu ilisimatusarfiata issittoq pillugu ilisimatusarnini annertusarniarpaa aamma issittoq ilisimasanik katersuivini annertusarniarlugu. Aamma Issittoq pillugu suleqatigiinnissamik piujuaannartitsinissamillu tunngaveqarluni ineriartortitsinissaq samminiarpaa, Kommunistit partiiata tusaataa China Daily taama allappoq.
- Ilisimatuut, inuussutissarsiortut katersorniarpagut - ataatsimullu ilisimatusarfissatut piukkussatsinnik ujaasitillugit, Yang Huigen, Kinamiut issittoq pillugu ilisimatusarfianni pisortaq China Dailymut oqarpoq.
Nunani avannarlerni suleqatissat ilaatigut tassaapput Islandimiut ilisimatusarfeqarfiat, Norgep Issittoq pillugu Ilisimatusarfia aamma Danmarkip nunat kangianiittut pillugit ilisimatusarfia.
