Kina MIO-p nersornaasiuttagaanik tunineqassava?

Meeqqat Inuussuttullu Oqaloqatiginnittarfiata MIO-p ukiumoortumik nersornaasiuttagaa, inummik peqatigiiffimmilluunniit meeqqanik immikkut ittumik sullissisimasumik ukioq manna aamma tunniunneqassaaq.
Allattoq Mads Lynge
oktobarip 15-at 2014 07:32

Nersornaat novembarip 20-anni tunniunneqassaaq, Naalagaaffiit Peqatigiit Meeqqanut isumaqatigiissutaata ukiunik 25-nngortorsiorneqarnissaa malunnartinniarlugu ulloq taanna nersornaasiisoqassalluni.

 

MIO-p nersornaasiuttagaa meeqqat pisinnaatitaaffiisa naammassineqarnissaat anguniarlugu sullissinermut pitsaasumut nersortarialimmullu nersornaasiinerussaaq. Nersornaatip aningaasartai 20.000 koruunit NunaFondenimit aningaasaliissutaapput.

 

Nersornaasiinerlu inummut peqatigiiffimmulluunniit nersornaasiinertut takussutissaavoq, isumaavorlu nersornaaserneqartoq nersornaaserneqarnermi saniatigut suliaminut aallulluakkaminut allanit ukkanneqalersitsinermik pilersitsisinnaammat, taamaalillunilu suliaqarfigisaani pissutsit pitsaanerulersinneqarsinnaallutik, MIO tusagassiuutinut nalunaarummi ilaatigut allappoq.

 

MIO-p angajoqqaat ineriartornermigut akornutilimmik meerallit peqatigiiffiat Inooqat siorna 2013-imi nersornaaserpaa.

 

- Meeqqat taakku peroriartortarput ajornakusoortunik avatngiiseqarlutik, annikitsuinnarmillu ikiortissaqarlutik. Angajoqqaat sorsunneratigut inuiaqatigiinni meeqqat innarluutillit atugaallu pillugit innuttaasuni politikkikkullu oqallinneq pilersinneqarpoq, MIO allappoq.

 

Kikkulluunniit innersuunneqarsinnaapput

MIO-p kina 2014-imi nersornaasissaneraa kikkut tamarmik innersuussutigisinnaavaat, tamannalu mailikkut aamma pisinnaavoq. Tassa mio@mio.gl allaffigalugu innersuussisoqarsinnaagami, soorlu aamma MIO-p internetikkut attaveqaqatigiittarfikkut Facebookikkut qupperneranut isernikkut taamaaliortoqarsinnaasoq. Aamma SMS-ikkut innersuussisoqarsinnaavoq, siunnersuisartut normuannut 1899-imut innersuussisoqarsinnaassagami.

 

Nersornaasigassat tassaasinnaapput inuit ajornartorsiutinut imaaliallaannaq aaqqinneqarsinnaanngitsunik periarfissaaleqigaluarlutik nutaamik isummersorlutik aaqqiissutaasinnaasunik ujartuillutik piviusunngortitsisut, soorlu meeqqanik inuusuttunillu sullissisoq, ilinniartitsisoq, perorsaasoq, timersornermi sungiusaasoq, sumiiffinniluunniit namminerisamik piumassutsini tunngavigalugu suliaqartoq.

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk