Kina-mi nuna sajummat ajunaartut eqqaaniarneqarput

Illoqarfinni annerni aliikkutassaqartitsiniarnerit tamarmik unitsinneqarput, Kinalu tamakkerlugu erfalasut ullaarli qiteqqullugit amuneqarput.

Kinami illoqarfiit pingaarnersaanni Beijingimi ullumi nalunaaqutaq 14.28-nngorniariartoq, tassa Kinami nunap sajunneranit sapaatip akunnera ataaseqqissaaq qaangiunniariartoq ajunaartut eqqaaniarlugit nipiliortitsisoqarpoq.

Kinamiut pisarnerat malillugu siggartaatit kalerrisaarutit, biilit qimuttuitsullu siggartaataat minutsini pingasuni eqqaaniaalluni siggartartinneqarput.

Sapaatip akunnerata siuliani nunap immikkoortuani Sichuanimiinnaanngitsoq, Kinali tamakkerlugu annilaarutaaqisumik, ukiuni 33-ni aatsaat taama sakkortutigisumik nunap sajorujussuarnera, taamatut minutsini pingasuni eqqaaniarneqarpoq.

Ulluni unnuanilu pingasuni Kina tamakkerlugu aliasunneq pisortatigoortumik ersersinniarneqarpoq.

Tamatuma kinguneranik aliikkutassaqartitsiniarneq tamarmi unitsinneqarallarpoq, tassa isiginnaartitsisarfiit, filmeriartarfiit assigisaallu aaqqissuussaminnik kinguartitseqqullugit piumaffigineqarput.

Aamma OL-imut ikumatitap Kinami angallanneqarnera unitsikkallarneqarpoq, imerniartarfiit aliikkutassaqartitsiviillu matoqqatinneqassasut oqaatigineqarpoq.

Kinami aviisit tamarmik ullumikkut qalipaateqanngitsumik saqqummersinneqarput. Ilisarnaatit qalipaatigissaartaqisut ilaanngillat, aviisillu saqqaat qernertuupput qaqortunik allaffigineqarsimasut.

Aamma qarasaasiat internetillu aliikkutassaqartitsinerat unitsikkallarneqarpoq, tassa nittartakkat aliikkutassaqartitsisartut spil’erfigineqarsinnaasullu matugallarneqarsimapput.

Ajunaarsimasut pisortatigoortumik nalunaarutigineqartut 32.000-iunerarneqarput, 220.000-illu ajoqusersimasut oqaatigineqarluni.

Nalunaaqutaq 14.31 minutsini pingasuni eqqaaniaaneqareermat aqqusinerni angallanneq aallarteqqinneqarpoq.