Kina-mi meeqqat nappaalallutik toqorarput

Virusi toqussutaasartoq meeqqanilu atuuttartoq maanna Kina-mi peruluutaaleruttorpoq. Maannamut meeqqat 23-t toqoreerput inuillu 4000-t missaanniittut toqunartumik tamatuminnga tunillanneqarsimapput. Kinami oqartussat tamaviaarlutik virusimik unitsitsiniaraluarput.
maajip 03-at 2008 17:06

Inuit 1000-t missaat maanna napparsimavinnut unerarput, taakkunannga qulerarterutaat inuunerminnik navianartorsiortutut oqaatigineqarput.

Virusi EV 71-mik taaguutilik pingasunngormalli meeqqani 500-t missaaniittuni perulutitsivoq.

Virusi taanna assanni isikkani qanermilu perulutitsisarpoq meeqqallu minnerit tamatuminnga eqqugaanerusarput timimikkut akiuussutissakinnerunerat pissutaanerulluni.

Nakorsaaneq Kore Mølbark nassuiaavoq nappaat qarngup iluani marniliuutitsisartoq kiisalu isikkani assannilu aamma amerlutitsisarluni.

Nakorsaanerli erseqqissaavoq virusi taanna nalinginnaasuugaluartoq toqussutaasussaanngikkaluartorlu eqqumiiginartuutippaali amerlaqisut Kina-mi tamatuminnga tunillanneqarsimanerat tamatuminngalu toqquteqarsimanerat.

Taannattaaq isumaqarpoq tamanna pillugu sukumiinerusumik misissuilertortoqartariaqartoq.

Nunarsuaq tamakkerlugu peqqinnissaq pillugu kattuffissuup WHO-p tamatuma toqoraataalernera aamma aarleqqutigilerpaa. Taakkumi isumaqarput pinartumik toqoraataasoqalersillugu qaratsakkut nappaateqalerneq uummallunneq puallunnerlu toqoraataanerugajuttaraluartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq