Kina immikkut maluginiarneqarluarpoq
CO2-mik aniatitat pilersittakkatik nunap aningaasaqarnikkut ineriartorneranit arriinnerusumik qaffakkiartornissaat Kinamiut neriorsuutigaat. Nunarsuarmi CO2-mik aniatitat tallimararterutaat ullumikkut Kinap aniatittarpai. DR-ip ilanngutassiortua Kinami illoqarfiit pingaarnersaannit Bejingimit ilanngutassiivoq Kinalu sooq periutsiminik allannguinersoq nassuiaatigalugu.
Silaannaap pissusaata allannguutaanit mingutsitsinermiillu ajornartorsiutit imminerminnut aningaasanik naleqaqisut Kinamiut nammineerlutik aamma misigisaqarfigivaat, nunap avannaani panernersuaqarpoq kujasinnerusumi qarsutsineqarluni, taakkulu aningaasanik ikigiinnagassaanngitsunik naleqarput. Ulorianaataat nalinginnaasumillu mingutsitsineq ilisimaaraat. Tassungali atatillugu erseqqissassallugu pingaaruteqarpoq, aningaasarsiornikkut ineriartorneq Kinamut pingaaruteqarluinnarmat, Kinamiut namminneq oqarnerattut nuna piitsuuvoq, inuimmi miliuunilikkaat suli piitsuussutsimut killiliussaq ataallugu Kinami inuupput. Taamaammat Kinami suli annertuumik ineriartortoqartariaqarpoq, ilusiliinerlu ineriartorfiullunilu CO2-mik aniatitsiffiusoq atorneqarniarpoq.
- Kina taama iliornermigut siuttunngussaaq, tassami pitsaasusseq anguniarlugu saqqummiussipput. Tamannalu USA-mut maannakkorpiaq qanoq iliuuseqarpiarsinnaanngitsutut isikkoqartumut sanilliullugu isigineqartariaqarpoq, USA-mimi inatsisartut nukissiuuteqarnermut silaannaallu pissusaanut tunngasutigut Obamap iliuuseqarniarumanera pinngitsoortittarpaat, Jan Larsen DR-imeersoq Bejingimiit taama oqaluttuarpoq, nangillunilu:
- Suliassaqarfimmilu Indiamiut aamma iliuuseqarpianngillat. Taamaammat Kina iliuuseqarumasutut siullersaalluni saqqummerpoq, taamaalillutik iliuuseqarumanngitsutut USA-mit isornartorsiorneqarnertik annikillisissinnaavaat. Tamatuma saniatigut taama iliuuseqarniarnermikkut imminnut naleqquttumik ilusiliisussaanertik Kinamiut iluaqutigaat, tamannalu iliuuseriniarlugu ullup ingerlanerani nalunaaruteqarnissaat naatsorsuutigineqarpoq.
Maani Nunatsinni CO2-mik qanoq annertutigisumik aniatitsisinnaanerput pillugu nunarput Danmarkimik maannakkut isumaqatiginninniarpoq, Jan Larsen oqarpoq.
