Kina illinnarnerpaamik najoqqutassiaateqarpa?

Nunarsuatsinni nerisassanik peqqinnartunik amigaateqarfiusumi, Nunatta aalisakkanik, qalerualinnik neqinillu soorlu puisit, savaaqqat, umimmaat tuttullu neqaannik pitsassuarnik peqarluarnini iluaqutigaa.
Allattoq Elisa Isaksen
oktobarip 18-at 2011 06:24

Nerisassat mamartorsuit tamakku assigiinngitsorpassuarnik nerisassiarineqarsinnaapput. Nerisassiornermullu ilitsersuutinik assigiinngitsunik pigisaqartut, Kommuneqarfik Sermersuup nerisassiornermut ilitsersuutinik saqqummersitsiniarneranut peqataasinnaalerput, pitsaanerpaanullu eqqugassaqartitsisoqarluni.

Innuttaasut nerisassiornermut ilitsersuutit pigisaat aallaavigalugit, Kommuneqarfik Sermersooq nerisassiornermut ilitsersuutinnguamik saqqummersitsiniarpoq. Taannalu Nuummi kalaalimineerniarfittaami tuniniarneqarniarpoq.

Nerisassiamut ilitsersuusiat, piumaguit assitalerlugu, e-mailikkut uunga nassiussinnaavat: erhverv@sermersooq.gl, kingusinnerpaamik oktobarip 28-anni.

Nerisassiornermut ilitsersuutit tiguneqareerpata, pitsaanerpaat qulit toqqarneqassapput, ajugaasullu novembarip aallaqqaataani Nuummi kalaalimineerniarfimmi nalunaarutigineqarumaarlutik. Tassanilu qulit akornanni eqquisussat makitsinikkut Asii Chemnitz Narupimit akissarsisinneqarumaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq