Kina akissarsitinneqassava?
Avatangiisinik pinngortitamillu mianerinninneq pillugu akissarsisitsinissamut atatillugu Nunamut Namminermut, Pinngortitamut Avatangiisinullu Naalakkersuisoqarfik innuttaasunit siunnersuutinik ujartuivoq.
Naalakkersuisut Avatangiisinik pinngortitamillu mianerinninneq pillugu 2007-imili ukiut tamaasa akissarsisitsisalerput. Ukiormannalu tallimassaanik akissarsisitsisoqassaaq.
Inuit, suliffeqarfiit kattuffiilluunniit pinngortitamik avatangiisitsinnillu mianerinninnissatsinnik ilisimaarinnilersitsisut, imaluunniit Nunatsinni suliniuteqarnermikkut avatangiisitsinnik pitsanngorsaataasumik iliuuseqarsimasut, nersorniarlugit akissarsisitsisoqartarpoq.
Taamaalilluni akissarsisinneqartussamik innersuussiniartut Nunamut Namminermut, Pinngortitamut Avatangiisinullu Naalakkersuisoqarfimmut maannamiit oktobarip ulluisa 15-iata tungaanut nassitsisinnaapput.
Siorna akissarsisinneqartut tassaapput Ilulissani innaallagialerisut, Peter Pars A/S, nukimmik ataavartumik suliniuteqarlutik, anorisaatinik ineriartortitsisimasut.
Akissarsiassaq 25.000 koruuniuvoq.