Kim Leine sisamassaanik saqqummersitsissaaq
Atuagaq 'Profeterne i Evighedsfjorden'-imik ateqartussaq, Aapakukkut Maaria Magdalenellu Maniitsup eqqaani uppertitsilernerisa nalaani pisimasuutinneqarpoq.
Pisup kingornatigut inuusut Aapaku, ilaatigut pruffiitioqqusersumik taagorneqartoq, quiassuaatigisarpaat. Aapaku nulialu nunaqarfimmi Illut-ni Maniitsup eqqaaniittumi 1787-imi uppertitsilerput. Kim Leinelli Aapaku allatut, akuersaarlugu, sammivaa.
- Qallunaat Kalaallit Nunaannik nunasiaatiginninnerannit qallunaallu aqutsinerannit kaanngarniarlutik kalaallit aaqqissuussamik iliuuseqarnerattut siullersaasutut isigaara. Aallaqqaammullu ingerlalluaqaat naggataagulli ajutoorlutik. Qallunaanit avissaarluni namminersulerniarnermik misiliinerusoq isumaqarpunga, oqarpoq.
Aapakuup nuannarineqarluarnini atorluarlugu uppertiminik arnanik atoqateqartarsimavoq. Tamannali Kim Leine naapertorlugu rockimik nipilersortartutut tusaamasarsuartut eqqumiilliuutaannaavoq.
- Nuannarineqartorujussuanngorsimavoq, rockimillu nipilersortartutut tusaamasatut imminut pingaartittorujussuanngorsimalluni. Taamaakkaluartorli Kalaallit Nunaata oqaluttuarisaanerani inuk soqutiginartuusimavoq, Kim Leine oqarpoq.
Kim Leinep atuakkiaasa sisamassaraat. Siusinnerusukkut atuakkat Kalak aamma Tunu saqqummersinnikuuai, taakku nunatsinni pisuusaartitaapput. Kim Leine ukiorpassuarni peqqissaasutut nunatsinni sulisimavoq. Nunarpullu atuakkiortarnerminut qujassutissaqarfigalugu oqaatigaa.
- Kalaallit Nunaat inuuninni pisimasuni pingaarnersaagunarpoq. Kalaallit Nunaannut, Kalaallit Nunaatalu uannut tunniussaanut, naaffeqanngitsumik qujamasuppunga. Pisariaqartitannik annassutigaara. Atuakkiorsinnaaninnut Kalaallit Nunaat pissutaavoq.
Kim Leine suli marlunnik atuakkiorusuppoq, maanna saqqummersitaanut ilanngullugit ajoqersuiartortitsineq pillugu nangeqattaartuliamik taasaminik. Atuagaq niuertoqarfiup Nuup pinngornera pillugu atuagarlu alla umiamik Tunumut 1884-mi ilisimasassarsiornermut tunngasuussaaq.
Atuagaq 'Profeterne i Evighedsfjorden' Gyldendal aqqutigalugu marsimi saqqummissaaq. Nunanullu allanut sisamanut tunineqareersimavoq - Spaniamut, Italiamut, Tysklandimut Norgemullu, Tuluit Nunaat Sverigelu atuakkamik pisissasut ilimagineqarpoq.
Kim Leine nunatsinnut tunngasumik isiginnaartitsissusiorniarpoq. Nunatta isiginnaartitsisarfianut isiginnaartitsissusiussaaq - isiginnaartitsissut Suersamut - tassa Hans Henrimmut tunngassaaq - taanna Tartupaluup qallunaatut atianut atsiussaavoq. Hans Henrik imaluunniit Suersaq 1850-ikkunni sapiitsuliortorsuusimavoq, sapiitsuliornerilu Kim Leinip isiginnaartitsissutiliaminut tunngaviginiarpai - isiginnaartitsissut pilersaarutit naapertorlugit 2015-imi takuteqqaarneqassasoq, Nunatta isiginnaartitsisarfiata pisortartaava Svenn Syrin oqarpoq.
