Kim Leine atuakkioqqippoq
Atuagaq 'Profeterne i Evighedsfjorden', kalaallisuunngorlugu ´Kangerlussuatsiami Pruffiitit´, palasip inuusuttup ukulluitsup Morten Falckip Nunatsinni ajoqersuiartornera pillugu atuakkiaavoq.
Atuagaq 1700-kkunni Maniitsumi pisimasuutitaavoq, atuakkiallu inuttaata palasip pruffiitinik Habakuk-mik nulianillu Maaria Magdalenamik Kangerlussuatsiarmiunik naapitsineranik oqaluttualiaavoq, taakkulu kristumiussuseq namminneq pilersissimasaat pillugu oqaluttualiaalluni.
Palasilli nunagilikkamini imminut ilisarisinnaanngornera atuakkami aamma qitiuvoq.
- Kalaallit Nunaannukartartut amerlanerit assigalugit atuakkap inuttaa imminut ilisarilerpoq. Inuimmi Kalaallit Nunaanni inuilaarsuarmi nunaqarfeeqqanilu najugaqaleraangamik imminnut ilisarilertarnerat misigisaavoq ilaatigut amiilaarnartoq.
Kim Leine DR-imi P1-imi atuakkiat pillugit aallakaatitassiami Kalaallit Nunaata immikkut sammineqarnerani taama oqaluttuarpoq.
Soorliuna qallunaat Kalaallit Nunaanniileraangamik imminut ilisarilertartut?
- Qallunaarpassuit inuunerminni qanga pisimasunit qimaallutik Kalaallit Nunaanukarajuttarput, soorlu uangattaaq taamaaliortunga. Imaassinnaavoq taakku ukiorpassuarni qimaareerlutik Kalaallit Nunaat qimaaffissatut kingullertut atortaraat. Tassa nunaqarfeeqqamiitsilluni allamut qimaariaqqissinnaajunnaarsimalluni, taava qanga pisimasut ajortulialluunniit saallugit akersuuttariaqalersarput.
Kim Leine nammineq 1989-imi Kalaallit Nunaannukarami kinaassutsini nutarterniarsimavaa kinguaassiuutitigullu atornerlunneqarsimanini puigorniarsimallugu. Ukiunili 15-ini nunatsinniikkami atoqatigiinnermik pinngitsuuisinnaajunnaarpoq, imerajuttunngorluni nakorsaatinillu atornerluilerluni. Aammali inuunermini ajornartorsiutini nunatsinniinnermini kiinnerfigisariaqarsimavai, iluatsittumillu qaangersinnaasimallugit.
Atuakkami palasip Morten Falckip pruffiitit takorluueqatigisaleramigit upperisani paatsiveeruttoorpaa, upperniaqatigiinnullu ilaalerami taakkunatuulli inuuneqalerpoq.
- Taassuma inuunermini aallaavii tamavimmik aseruillutik aserorput. Tassalu Kalaallit Nunaaniinnerata kinguneri. Aamma uanga tamanna misigereerpara, soorlu qallunaat allat ukiorpassuarni aamma taamatorluinnaq misigisarsimasut. Taamaammat oqaluttuaq taanna oqaluttuarissallugu piukkunnartissimavara. Tassami Kalaallit Nunaaniinnerup kingunerisaanik qanga ilumoorsorisat pujoralanngortuusiinnartarput, inuttullu allannguutaasinnaallutik.
Kim Leinep atuakkiaa siulleq tassaavoq 2007-imi saqqumeqqaarneqartoq "Kalak", atuakkiaalu naliliisartunit nersualaarneqarluaqaaq.
Atuagaq nunani arfineq marlunni tunisaalereerpoq, atuakkiallu nunani allani aamma saqqummersinnissaa Gyldendalimit naatsorsuutigineqarluni.
