Kim Kielsen politiinut unnerluutigineqarpoq

Taanna aamma politimesterip tulliata Morten Nielsenip uppernarsarpaa.

Tallimanngormat unnukkut Radioaviisimi Kim Kielsenip Johan Lund Olsen inatsisartut ataatsimiittarfianni Kuupik Kleistimik taasissussisimanerarlugu innerluutigaa.

Johan Lund Olsenip radioaviisimi arfininngormat Kim Kielsen ilumuunnginnerarpaa, nalunaarutigalugulu naalakkersuisunut ilaasortaq Kim Kielsen eqqunngitsumik nassuiaasimanera aamma eqqunngitsumik unnerluutiginninnera pissutigalugit politiinut suliassanngortinniarlugu.

Morten Nielsenip unnerluussinera qanorpiaq oqaasertalerneqarsimanera oqaatigerusunngilaa, taamaattorli oqaatigalugu, politiit misissueqqissaarlutik aallartissasut, suliallu qanoq ingerlateqqinneqarnissaa kingusinnerusukkut isummerfigineqarumaartoq.

- Misissueqqissaarnitta qaqugu naammassineqarsinnaanissaa oqaatigisinnaanngilara, kisianni sapinngisarput naapertorlugu tuaviortumik suliarissavarput, Morten Nielsen oqarpoq.